News

Mizoram Police tarlan danin, ni 27.04.2026 khan office memorandum lem pakhat (Office Memorandum No. F-23012/36/2025-ESTT-CSD, ni 27 April 2026), General Administration Departmen (GAD)t-in ruah sur nasat avanga sawrkar chawlh a puanna ni awm tak chu social media platform hrang hrangah thehdarh niin mipuite tan buaina nasa tak a chawk chhuak a ni.

He document-ah hian Irene Zohlimpuii Chongthu, Additional Secretary, GAD hming chuangin, Ch. Lalnunkima, Deputy Secretary, GAD-in digital signature-in a sign hnan angin a lang a ni. Hemi chungchangah hian Christina Lalmuanzuali, Under Secretary, General Administration Department, Aizawl District chuan Cyber Crime Police Station-ah dan anga hma la tura ngenin FIR a theh lut. A ngenna angin CCPS Case No. 17/26 dt 27.04.2026 u/s 336(3)/353(1)(b) BNS 2023 chu ziah luh nghal niin, rang tak leh uluk taka chhui chhunzawm nghal a ni.

Document lem siamtu hi rang takin darkar 24 liam hmain chhui chhuah a ni. Ni 28.4.2026 hian he sawrkar thuchhuah lem siama vawrh darhtu, Lalramhlua (18), s/o Michael Lalramchhana, Upper Republic, Aizawl chu man nghal a ni.

Sorkar document siam danglam emaw siam chawp leh theh darh hi dan kalh tlat a ni a, hetiang thil lakah hian mipuite fimkhur hle turin Mizoram Police-te chuan an chah. Lo inhnamhnawih te chungah dan anga na taka hma lak zel a ni dawn tih an tarlang.

Mizoram Police chuan mipuite chu social media (Facebook, Instagram, Whatsapp etc) hmanga kan thil thawn darhah fimkhur lehzual turin leh thudik finfiah hmasa ṭhin turin an ngen nghal.