Online Medical Referral System tlangzarh

Vawiin (20.5.2026) chawhma khan Health & Family Welfare Minister Lalrinpuii chuan, mipuite tana healthcare service leh sawrkar hnathawh tihchak zualna turin, online medical referral system chu Secretariat Conference Hall-ah a tlangzarh.

Health Minister chuan online-a medical refer awlsam taka Health & Family Department hnuaia tih theih a ni ta mai chu lawmawm a tih thu sawiin, “Digital hmalakna-te hi healthcare governance tih changtlunna leh mipuite tana kawng awlsam leh hmalakna tha zawk thlenna kawnga hmasawnna pawimawh tak a ni,” tiin online system chu document dahṭhat nan te, information inpek nante leh awlsam zawka mipuite dawrna kawngah hmang ṭangkai turin kalkhawmte a chah

Online Medical Referral System chungchang:

Mizoram Sorkar chuan mipui hriselna ngai pawimawhin, damlo enkawlna kawnga harsatna awm te zirchiangin, siamthat dan tur a ngaihtuah. Damlo na tak, Mizoram pawna enkawl ngaite tan referral kal phung, awlsam zawk leh mipuite tana rang zawka tih dan tur a ngaihtuah a ni. Damlo phaia refer a bik takin, Aizawl District pawna awmte tan, hun khawh ral lo leh an refer-na hmun rang taka an thlen theih nan, Directorate of Hospital & Medical Education (DHME) leh Mizoram State e-Governance Society (MSeGS) te ṭangkawpin online referral system an rawn duang chhuak a ni.

Medical Referral Board hi tun dinhmunah, Aizawl leh Lungleiah chiah awmin, Medical Referral Board-in a recommend te chu an thawhna Department aṭanga Forwarding lehkha nen DHME-ah provisional permission dil a ngai ṭhin. Hei hi damlo tan a buaithlakin, hun tam tak khawh ral ṭhin a ni.

Tunah chuan District Hospital tinah District Screening Committee (DSC) din ni tawhin, phaia damlo refer ngaite an awmna district DSC te’n lo zirchiangin, Medical Referral Board (Aizawl & Lunglei)-te nen video conferencing hmangin recommendation an siam tawh anga; chu recommendation chu DHME-ah kal kher ngai lovin, phone emaw personal computer emaw aṭangin link medicalreferralmizoram.in ah lutin online hmanga permission hi cheng 20 chawiin dil tur a ni.

He online referral portal hi sorkar hnathawkte tana siam a ni a, an department thawhna aṭanga forwarding letter leh board lehkha nen upload mai tur a ni. Provisional permission nen hian, Mizoram State Health Care Society (MSHCS)-ah in-report leh tur a ni. Sorkar hnathawk nilo (MUHCS beneficiaries – General) te chu MUHCS-ah medical board lehkha nen in report tur a ni thung. Final permission hi document enfel a ngaih avangin, DHME-ah damlo emaw an chhungte emaw office hun chhunga kalin lak chhuah theih a ni ang.