Pawngsualtuin thiam loh chang

A tunu hmeichhe naupang kum 10 mi pawngsual thintu kum 67 mi chu vawiin (18.11.2025) hian Kolasib District Fast Track Court chuan thiam loh a chantir.

Thu dawn danin, Vairengtea nu pakhat chuanJune15, 2021 khan Vairengte Police Station-ah FIR thehlutin, a fanu kum 10 mi chu a pu in kum 2017 leh 2018 chhung khan a pawngsual thin niin a tarlang. Hei hi Vairengte Police chuan chhuizui nghalin, pawngsualtua puh hi an man zui a ni.

Pawngsual tawk nia sawi hmeichhe naupang hi doctor-in a endiknaah mipat hmeichhiatna lam hawia khawih chingpen ngei a ni tih hriat a ni. Thubuai ngaihtuahtu Kolasib Fast Track Court Judge chuan thuhretute thusawi leh finfiahna hrang hrang atangin hmeichhe naupang hi pawngsual ngei a ni tih finfiah a nih thu vawiin hian a puang.

Hmeichhe naupang pawngsualtu hi kum upa lam a nih avangin bail-a chhuah lai lawk tir ni mah se, vawiin khan man nghal niin, jail-a khung nghal a ni. Hrem a nih dan tur kimchang chu November 20, 2025 ah puan a ni ang.

(Pawngsual tawktu nihna hriat theihna a nih dawn vangin pawngsualtu hming leh thlalak tarlan a rem lo – Bengvarna)