PHE Dept.-in ngenna an siam

PHE Engineer-in-Chief Zodinthari chuan a hnuaia tarlan ang hian mipuite hnena ngenna leh hriattirna a chhuah a, Aizawl khawpuia tui sem tur duhang tawk a awm theih loh chhan a sawifiah.

PHE E-in-C ngenna :

Kumin furpui chhungah leh vawiin ni thleng hian Aizawl khawpuiah tui sem tur duhang tawk a awm thei loa, PHE Department chuan pawi a ti tak zet a ni. Tui sem tur a awm tam theih loh chhan chu hetiang hian a sawi theih awm e.

Kumin fur tan tirah khan Vaivakawn Zohnuaiah (Phase-III) Pipe line chu lei chein a tih chhiat avangin he Scheme atanga tui pump chhuah thin chu vawiin ni thlengin tui pump theih a ni ta lo. Tlawng Reiek kai atanga Greater Aizawl Water Supply Scheme, Phase-I & Phase-II atanga tui pump chhuah thin pawh ruah a sur apiangin tui tihfim theih loh khawpa a nut nasat thin avang in tui pump chhuah theih zat tur pump chhuah theih a ni thin lo bawk a ni.

Heti tak a tui a nut nachhan hi tlawng lui fintu luite ah mipuiin leivung kan paih avang te,kawng laihna leivung kan paih avang te leh ramhnuai leimin avang te a ni deuh ber. Tui nut san lai phei chuan NTU 1000 chuang te ni thin a ni.

Aizawl khawpuiin ni tin tui 38 MLD a mamawh a, chutih laiin Greater Aizawl Water Supply Scheme, Phase-I & Phase-II hian ni khatah 25 MLD to 28 MLD (average) chauh tui pump theih a ni. Hei vang hian Aizawl khawpui chhungah chawhrualin thla khat chhungin tui connection pakhatah tui vawi hnih-khat bak sem tur a awm thei loa, pawi kan ti hle.

Phase-III pipe line Zohnuaia mi hi siam mek a ni a, PWD lamin kawng chhak lam leimin dawlna an siam ve mek. Ruah a la sur fo avangin leimin hi a la tawlh zel a, hmasawn a harsa viau a, chuti chung chuan ngawrh takin PWD leh PHE-te hian hma an la mek zel a ni. November thla chhungin tui pump chhuah leh theih beisei a ni e.

Aizawl khawchhungah hian mimal tuizem atang leh pipe line atang a tui leak ven hna theih tawp in Department in a thawk a,hma pawh kan sawn hle in kan inhria. Tui leak report na tur Water Leak Report Apps siam a ni. Hei hi hmang tangkaiin mipui lamin PHED min tanpui a report hi min pe thin turin kan ngen.

Vawiin ni thleng hian he Application kaltlang hian tui leak report hmun 310 chuang atangin report dawn tawh a ni a, a rang theiang bera siam that hna thawh nghal zel a ni. Hei bakah hian mimal tui dahna tanga tui liam ven nan Ball Float Valve vuah hi department chuan tha a ti a, mipui hnena ngenna tih chhuah a tum mek bawk a ni.

Tui ren chungchangah te, ruah tui khawl chungchangah te, tui leak ven chunchangah te leh mipui in tur tui lak tibawlhhlawh thintu leivung leh bawlhhlawhte hi a paihna hmuna paih turin PHE Department chuan mipuite thawhpuina a sawm tak meuh meuh a, tun hnaia tui semthat theih loh chungchangah mipuite hriathiam na a ngen tak meuh meuh bawk a ni.