News

Mizoram Police chuan thuchhuah siamin, Lunglei District Jail-a tangte lehkha lem hmanga chhuah an nih chungchanga police hmalak dan leh thil thlen dan an tarlang.

Mizoram Police tarlan danin, Lunglei Police Station chuan ni 27.04.2026 khan R.Lalduhawmi, District & Sessions Judge, Lunglei Judicial District, Lunglei hnen atangin First Information Report (FIR) an dawng a. FIR-a a ziah danin ni 24.04.2026 a court a a thut laiin tuna Lunglei District Jail-a UTP Judicial Custody-a awm mek mi pahnih Malsawmtluanga leh Dokapthangate chu an inlan a ni. Heng mite hian ni 13.04.2026-a Court of District & Sessions Judge, Lunglei Judicial District lehkha leh ni 10.04.2026-a Hon’ble Gauhati High Court lehkha, ni 24.04.2026-a court hearing nei tur leh Rs 50,000 fine-a discharge bond-a an chhuahna tur order an rawn keng a ni.

Mah se, heng mi pahnihte hi a hma ni, ni 23.04.2026-ah ama hnenah ngei court hearing an nei zo chiah a, an hearing neih leh hun tur pawh ni 08.05.2026 ah fixed a lo ni tawh. He thil avang hian ringhlelin District Jail, Lungleiah thil awmzia chhui chiang tur leh clarification siam turin a kal nghal. A chhui chianna aṭangin heng mi pahnih – Malsawmtluanga leh Dokapthangate mai bakah hian lehkha dik lo hmanga jail tang (convict tawh) chhuah an awm nual nia a lan avangin Lunglei Police Station ah FIR a thehlut ta a ni.

Lunglei Police chuan rang taka hma la nghalin FIR in a sawi lan mi 15, document dik lo hmanga chhuah tawhte zawn hna hi an thawk nghal a, mi 11 chu man letin jail-ah dah let leh nghal an ni a, pakhat lo boral tawhin, Khawzawl Police-in an lo man mek pakhat awm bawkin, mi 13 te chin hriat nghal a ni. Chhui chhunzawm zelna atangin document lem hmanga chhuah takte hi mi 17 an lo ni zawk tih hriat a ni a, POCSO case te, ND&PS case leh ruk ruk case a convict tawh te an ni hlawm a ni.

Police in a chhui zelnaah he thila mawhphurtu ber nia lang, Jeremia Lalthangtura (25) s/o James Lalzawmmawia of Zemabawk, Berawlui Veng, Aizawl tuna Dictrict Jail Lungleia UTP a tang mek leh C Laltlanhlua (31) s/o C.Lalbiaksanga of Republic Vengthlang, Aizawl, tuna Dictrict Jail, Lungleia a nghet loa ambulance driver hna thawk mekte chu an inhnamhnawih ngei nia hriain, ni 1.05.2026 khan man an ni a, ni 7.05.2026 khan District Jail, Lungleiah dah luh an ni. Investigation atanga a lan danin Jeremia Lalthangtura hian heng convict mi 17 te hi lo bum kualin an case-ah appeal a siam sak theih thu leh a hmelhriat ukil a lo biaksak tur thu tiamin pawisa a lo laksak thin a ni.

Tangho hnen atang hian Jeremia hian Rs.4,000 atanga Rs.50,000 thlengin pawisa hi a lo laksak thin a, heng atanga pawisa an hmuh zawng zawng hi Rs.1,35,000/- bawr vel a ni. An pawisa hmuh te hi Jeremia leh C.Laltlanhlua te hian an lo insem thin tih hriat chhuah a ni. Pawisa hi C.Laltlanhlua kutah emaw a Gpay account-ah a lut thin . C.Laltlanhlua phone leh banking transaction zawng zawng hi a remtihna thlapin Jeremia Lalthangtura hian Jail chhunga atang hian a hmansak thin a ni.

Document lemte hi Jeremia Lalthangtura hian hmun hnih, Rahsi Venga xerox leh printing tih theihna computer dawr pakhat leh District Jail, Lungleia office computer-ah te a lo siam thin tih finfiah a ni. C.Laltlanhlua hian office chahbite lo dil chhuakin Jeremia-a’n computer a hman lai hian a lo veng thin tih hriat a ni. Heng a document siam chawpte hi C.Laltlanhlua hnenah hlanin C.Laltlanhlua hian jail thuneitute hnenah a pe thin a ni. Heng document lem siamna atana hman computer leh printer te hi man niin, Forensic Science Laboratory-ah thawn nghal a ni.

Jeremia Lalthangtura hian jail tangte hi bumin an chhuah theihna turin hma a la a, pawisa an chawi hnuah an chhuahna order a lo thlen mai tur thu hrilhin, heng order-te hi amahin siam chawpin C.Laltlanhlua hian a lo pui thin. Heng document leh court order lem te hi jail thuneitute hnena an thlen hnuah jail thuneitute hian order hmang hian jail tangte an lo chhuah ve mai thin a ni. Heng mi tang 17, document lem hmanga chhuahte hi ni 30.01.2026 leh ni 18.03.2026 inkarah jail aṭanga chhuah an ni. He case hi Investigation la zawh loh niin chhui chhunzawm mek zel a ni e.