News

Vawiin (24.4.2026) hian Planning Conference Hall-ah Mizoram State Project Monitoring Committee chu Chief Minister Lalduhoma kaihhruaiin an thukhawm a, an project endikte umzui dan tura an rawtna ngaipawimawh lo department hotulu berte chu insawifiah tura committee hmaa koh thin tawh ni se, an ti.

Chief Minister chuan hmasawnna hna hi chak takin kal se kan duh avangin project work kal kawng an ti tawi tih sawiin, “Tun hma chuan department-ten Finance Dept.-ah allocation an rawn dil a, rei tak file a kal a, chu mi zawhah administrative approval an rawn dil leh a, rei tawk tak file a kal leh a ni. A dawtah expenditure sanction an rawn dil leh a, rei tawk tak bawk hun a kal leh a ni. A tak taka hna kan tan theih hun a tlai thin. Tunah chuan secretary-ten an department project administrative approval leh expenditure sanction an lo pek ve theih dan tur kan duang ta. Hei hian nasa takin hmasawnna hnathawh a ti chak dawn a ni,” a ti.

Meeting-ah hian an project endikte umzui dan tur an rawtna, a mawhphurtu (concern) department-a an thlenten ngaihpawimawh a hlawh leh zual theih dan tur pawh sawiho niin, an thurawn ngaipawimawh lo department-te chu an hotulu berte committee hmaa insawifiah tura koh thin tawh ni se. Chumi hnua la bawhzui tha lote chu an chunga hremna (action) la tura sorkara thlen zel ni se, an ti.