PWD Minister-in kawng siam mek a endik

Nimin (28.1.2026) chawhnu khan PWD Minister Vanlalhlana chuan Leitan leh Sihphir inkar kawngpui siam that hna thawh mek chu a hmunah a endik a, Durtlang khawtlang hruaitute nen an inkawm nghal.

PWD Minister chuan sawrkarin kawngpui siamna tura sum a pekte chu a nih dan tur ang taka hman a nih avangin sawrkar sum daihzai zawkin hman a nih thu a sawi a, “Kawngpui hi kan ram hmel lanna a ni. Kawng siam meka Joint Action Committee-in vilpui tura mawhphurhna an la hi an fakawm hle. Khawtlangin kawng tha an duh zia tilang a ni,” tiin tunhmaa vantlang thil enkawl sawrkar tih tur chauha kan ngaihna chu kan kal pel tawh a, tunah chuan mahni ta angah ngaiin, dim nachang kan hriattawh thu a sawi.

Chief Engineer (Highways) Robin Lalrinawma leh SE, Central Circle Lalrinngheta ten PWD aiawhin thu an sawi a, he kawngpui siam tura ruahmanna an lo siam tawh dan leh hmachhawp awmte an tarlang a, “Zuangtui leh Selesih inkar siamthat hna chu he kawngpui thawh zawh ruala thawh tan ve nghal a ni ang,” an ti.

Durtlang khawtlang hruaitute pawhin kawng siam danah an lungawi thu lo sawiin, khawtlang mamawh hrang hrang Minister hnenah an thlen nghal.

‘Widening and Improvement of Leitan to Sihphir’ kms. 10.25-a thui a ni a, Central Road and Infrastructure Fund (CRIF) hmangin SLT Infracon Pvt Ltd.-ten an thawk mek a, tun atang hun rei lotea zawh beisei a ni.