News

Naktuk (18.6.2026) hian Mizoram Rajya Sabha MP tur thlan a ni dawn a, MNF leh ZPM-in candidate an nei. BJP leh Congress MLA-te chuan vote an thlak dawn lo. MLA dang zawngin vote an thlak chuan vote 37 a tla dawn tihna.

Zing dar 9-ah vote thlak hun hawn a ni dawn a, tlai dar 4 thleng vote thlak theih a ni ang. Vote thlak zawh tlai dar 5-ah vote chhiar nghal a ni. MLA-te chauhin vote an neih avangin Mizoram Rajya Sabha MP thlang thei hi mi 40 an awm.

Vawiina Mizoram Pradesh Congress Committee a thuneitu sang PAC thukhawm chuan kan hma lawka Member of Parliament (Rajya Sabha) member tur thlanna neih tur chungchang a ngaihtuah a, an MLA neihin vote thlak loin hai (abstain) mai se an ti. Congress Party hian MLA pakhat C Ngunlianchunga an nei a, Lawngtlai West Bialtu a ni.

MPCC chuan, “MNF Party atangin an candidate vote pui tura sawmna zahawm tak kan dawn te pawh uluk taka ngaihtuah a ni. MNF-te hi rorel lai ZPM party-te ang thoa kan ram, kan hnam, kan sakhua himna atana hlauhawm BJP nena puan inzarzawm te tho an ni. Parliament-ah BJP-te thlawp tur tho an nih avangin an candidate vote pui chu BJP te thlawpna tluk a nih avangin Congress Party chuan kan vote pui thei lo,” an ti.

Hetihlai hian Mizorama MLA pahnih nei BJP pawhin vote an thlak dawn loa nia thudawn a ni. Vote an thlak loh chhan tur chu an hotute’n thlak lo mai tura an tih vang. BJP MLA-te chu an president Dr K Beichhua, Siaha Bialtu leh Palak Bialtu K Hrahmo-te an ni.

ZPM chuan MLA 27 nei mekin, MNF chuan MLA 10 an nei. Vote an thlak vek chuan vote 37 a tla dawn tihna a ni a, an party candidate an vote ve ve vek chuan ZPM-in vote leh MNF-in vote 10 an hmu dawn tihna a ni.