News

Vawiin (3.12.2025) chawhna khan Mizoram CAMPA Governing Body chu an Chairman Lalduhoma, Chief Minister hoin CM Conference Hall-ah an thukhawm.

Chief Minister chuan, ramngaw siam thar kawngah chak zawka hma lak a ngaih thu sawiin, “Hnathawhna tur sum kan nei a ni. Kan ram a lo mawi deuh deuh theih nan kan state tree Herhse hi uar thei ila, ramngaw siam thei thlai, kuthnathawktute tana tangkai si. Rubber ang chite pawh uar ang u. Thenzawl chu Peace City atana Master Plan siam mek a ni a, rel kawng kalna tur hi an rawn tichiang thuaiin a rinawm. Heng thilte hi tih fel a nih hma chu Thenzawlah hma lo lak rih loh ni se, tihchhiat leh mai tur hmalakna kan lo kalpui palh kha a hlauhawm a ni,” a ti.

Meeting report-a a lan danin, kum 1990 atanga kumin thlengin Mizoramah forest ram 11,768.8909 hectare a zau chu non – forest areaah chantir (diverted) a ni tawh. Heng ramngaw an tihchhiat rulh lehna tur hian hmasawnna hnathawktu (user agency) ten danin a phut angin PARIVESH portal kaltlangin National CAMPA-ah pawisa an chhunglut thin. Ramngaw rulhna tur an chhunluh zaa 90 chu National CAMPA hian hnathawhna State Compensatory Afforestation Fund (Public Account) ah dah luh (tranfer) zel a ni. Tuna Mizoram State Compensatory Afforestation Fund, component hrang hrang belhkhawm awm zat chu Rs. 2,12,15,38,556 a ni.

Chak zawka fund hman chhuah dan tur an sawihova, Annual Plan of Operations 2024 – 25 hnathawhte leh Annual Plan of Operation 2025-26 hnathawk mekte an en a, CAMPA Work endik hna 3rd Party Monitoring and Evaluation, Save Environment Association of Mizoram (SENVA) te report an ngaithla bawk. SENVA hian CAMPA APO 2020-21 leh 2021- 22 hnathawh chu ‘very good’ grade (7.5/10) a pe a ni.