News

Sairang Bamboo Factory-a chowkidar Lalramzauva (49) chu Sairang rel kawngah thiin hmuh a ni a, a thih chhan tak hriat ni lo mah se, relin a chil nia rin a ni.

Thu dawn danin, Lalramzauva hi Myanmar lam mi a ni a, Sairang leh a chhe velah mi huan thlam enkawlin kum 10 bawr vel a awm tawh. Tunah hian GOP Bamboo Factory-ah chowkidar-in a awm mek a ni.

Nizan khan Sairanga damdawi lei tura a kal chu hmuh zui a ni loa, vawiin (14.3.2026) chawhma dar 10 vel khan Railway hnathawkten Sairang Dinthar huam chhung Thlanvawng kawn liama rel kawngah a ruang an hmu.

A thawmhnaw hak leh a pian phung vel atangin a thawhpuiten Lalramzauva a ni tih an finfiah.

A ruang hi a la chhiat lutuk loh avangin tukin dar 8 leh dar 9 inkar vela Silchar lam pan relin a chil nia rin a ni. Finfiahna erawh a awm lo.

A chetsualna hi Sairang Dinthar huam chhung a nih avangin Sairang Dinthar Branch YMA-in an buaipui a, kuang pawh an siam sak a ni.

A ruang hi vawiin khan Sairang PHC-ah endik a ni a, vawiin tlai khan Sairang thlanmualah vui liam nghal a ni.