News

Tukin (3.3.2026) dar 7:00 khan FCS&CA Minister B. Lalchhanzova chuan Sairang Rel Station-ah buhfai quintals 25,901, Rel wagon 42-a lokal a lo hmuak thleng. He buhfai phur rel (train) lo hmuahna programme tawi, Food Corporation of India (FCI), Divisional Office in a buatsaih-ah hian Rajya Sabha MP K.Vanlalvena, pawhin Chairman, State Consultative Committee of FCI a nihna angin a tel pui.

B Lalchhanzova chuan rel hmanga Sairang Rel Station a buhfai phurh thlena a lo awm ta hi Mizoram mipui tan thil chhinchhiah tlak tak nia a hriatthu sawiin, “Kan hma lawka furpui lo thleng turah pawh ka thla a muang sawt. Mizoramin thla khata buhfai kan mamawh zat hi 97,000 quintals a ni a, 55,000 quintals hi FCI atanga kan dawn niin, 41,000 quintals hi a thlawn a kan dawn a ni. A bak zawng hi Open Market Sale Scheme (OMSS) atanga quintal khat Rs. 830 a lei niin, buhfai quality tha zawk lei tuma hmalak chho mek a ni. Tunah chuan Aizawl,Lunglei leh Lawngtlai FCI Godown-a dah tur chu Sairang Rel Station-ah hian a lo thleng tawh dawn. Bairabi Rel Station-ah chuan Mizoram hmar lam godown-a dah tur a thleng ve tawh thung dawn a ni,” a ti.

Supply Minister chuan Sairang Rel station-a buhfai lo thleng tur chungchangah hian Sairang Dinthar khawtlang hruaitute leh YMA-te nen pawhib meeting an neih tawh thu sawiin, “Buhfai hi chawlh ni (Sunday)-ah te, zing leh zanah te pawh a lo thlen hun a awm dawn. Rel station atanga, Sairang Dinthar-a FCI Godown-a motor lianin a thiar a ngai dawn a ni. Chuvangin Sairang khawtlang nun pawh a tibuaina chin a awm ang. Hemi kawngah hian Sairang mipuite dawhtheihna leh hriatthiamna pawh ka ngen tak zet,” tiin Sairang mipuite harsatnaa hma lakpuitu tur Aizawl DC leh Traffic SP te hnenah lawmthu a sawi.