Oct 25, 2025
Saturday
Tourism Department leh Khawhai khawtlangin an buatsaih, Mizorama la awm ngai lo, Remna Kut (Peace Fest 2025 )chu ni hnih chhung Khawhaia neih a nih hnuah, vawiin (October 25, 2025) hian a tiak ta.
Peace Fest 2025-ah hian kum 133 kal ta a Dawn pasalthate leh Lal Nikuala khua Chawngtlai pasalthate inbeihna hmun, Pawi thah kawn, Khawhai tlangah inremna saui tan a ni. Saui tan tur hian Dawn khua Myanmar atangin palai 30 chuang an lo kal.
Pasaltha hruaitute ve ve, Dawn Pasaltha Ralbila leh Nikuala pasaltha Chawngluta thlahten inremna hi an siam a, Pasaltha Ralbila thi pawh a thlahte hnenah pek let leh a ni. Dawn khaw lamah an hawn hnuah hun remchang hmasa berah Aizawla museum-ah dah tura ruahman a ni.
Festival chhung hian programme hrang hrang – peace concert, nghakuai chiah leh cultural programme hrang hrang neih a ni a, naupang intih hlimna chi hrang hrang buatsaih a ni bawk.
Peace Fest hi kumtin buatsaih tura ruahman a ni.
