RTI hmanga dilna pe chhuak turin hriattir

Mizoram State Chief Information Commissioner (CIC) John Neihlaia chuan Mizoram Universal Health Care Scheme (MUHCS) chungchanga Mizoram Sawrkar leh Synod Hospital inremna J Malsawmzuala’n RTI Act hmanga a dilna chu September 23, 2026 aia tlai loa pe chhuak turin a hriattir.

State Information Commission thutlukna-a tarlan a nih danin, RTI hmanga dilna thehluttuin a hriat duh mipui scheme kalpui chungchang leh mipui sum hman chungchang a nih vangin a tangkai hlein Commission chuan a hria a ni. Third party (Synod Hospital) pawh ngaihdan sawina hun pek a nih hnuah, anni lamin RTI Act hmanga zawhna zawttuin hriat duh a neih pek chhuahah sawiselna an nei lo.

Tin, Gauhati High Court pawhin he thil a ngaihtuah laiin, he inremna hian mipui sum leh mipui enkawlna tura sawrkar scheme a huam avangin, mipui hriat chianna kawngah mipui hamthatna a awm tih chiang takin a lantir a ni. Chuvangin, he thilah chuan danin a khapna awm mah se, mipui hamthatna chu a chungnung zawk tih thutlukna chu sawisel ngai a ti lo.

A chunga tarlan takte avang hian SIC chuan MUHCS SPIO & Finance Officer chu man chawi ngai loa RTI Act hmanga diltuin a hriat duh zawng zawng chu a man chawi ngai loin, September 23, 2026 aia tlai loah pe turin a hriattir. A pek tawh document zawng zawng nen compliance report pawh Commission hnenah hriat atan a thawn tur a ni.

Tarlan tawh angin, SIC thutlukna lo siam hmasak chu Mizoram Sawrkar chuan Gauhati High Court-ah an khinglet a ni. Court chuan third party-in sawi ve tur an neihte sawina hun pe loa information pe chhuak tura State Information Commission-in thutlukna siam leh, a thutlukna-a lungawi lohna neiten an thlenna tur hmun Order a tarlang tel lote chuan ‘Dan hmanga enfiahna a paltlang zo lo a, order dinglai chu thiah a ni. State Information Commission chu Dan ang taka ngaihtuah nawn leh a, thutlukna siam leh turin a ti a ni.