Ruihhlo do beihpui thlak tan

YMA Kumpuan ‘Ruihhlo Do’ bawhzuina kal zelah Central YMA chuan February 20,2026 atang khan Aizawl khawpui chhungah beihpui a thlak tan. a, mi eng emaw zat duty-in an thawk chhuak.

Central YMA kaihhruaina-a ni 23.01.2026- zana Dawrpui Multipurpose Hall-a Aizawl khawpui chhunga branch YMA 111 te kalkhawmin an rel angin Aizawl khawpui chhunga branch hrang hrangte hi zone 10 ah inthen a ni. Zone tinah hian Zone Anti- Drugs Squad (ZADS) din a ni a, puipate inruatin an huamchhunga branch tin atangin ZADS member tur 3 theuh inruat a ni. Zone tin hian duty post siamin February 20,2026 atang khan ruihhlo do beihpui hi an tan.

Heng zone hrang hrang duty post-e hi ni 21&23.2.2026 zan khan Central YMA hruaituten tlawh kualin bul tan nan Rs.10,000/- theuh an hlan. ZADS hruaitute leh member-te infuihna hun an hmang nghal. Central YMA hian a tul angin Zone tin te mamawh leh harsatna te a enpui zel dawn a ni.

Zone tinah hruaitute leh member-te an phur a, an huamchhung theuhva ruihhlo do beihpui thlakna kawngah theihtawp chhuah a beih an tum a, khawtlang mipuite tawiawmna an beisei.

Heng Zone Anti- Drugs Squad -te hi Central YMA hnuaia Central Anti- Drugs Squad (CADS) te nen inpuibawm tawnin an thawk ho dawn a, Central YMA hruaitu ten an vil reng dawn.