Ruihhlo Do hawn inkhawm

Ni 10.12.2025 (Nilaini) zan dar 8.30 khan kum 2025-2027 chhunga YMA kumpuan ‘Ruihhlo Do’ chu Vanapa Hall-ah Central YMA President R. Lalngheta’n a hawng.

Kumpuan hawnna inkhawm hi Prof. Lalnuntluanga, Vice President-in a kaihruai a, H. Duhkima, Treasurer-in hunserh a hmang. Prof. Malsawmliana, General Secretary-in inhmelhriattirna hun hmangin, kumpuan chungchang a sawifiah.

Kumpuan hawngtu CYMA President chuan thu sawiin, “Zanin atangin khawlai a kan unaute thle mai mai riahna tur tha nei lote, CYMA Kumpuanten hma la tanin TBCC-ah dah thlak tan leh a ni ang. Ruihhlo do hi a sawt tih a takin ka hria, pafa in be thei tawh loten, in ngai taka an han awmho/inkawm lehte hmuh hian a hlawhtlin zia kan hmu. Ruihhlo ngai te diriam loin, an tan a tha turin YMA hruaitute, ruihhlo ngaite chhanchhuak turin kan puanven i sawi chhing i la, fimkhur tak leh diktakin ruihhlo i do tlang ang u,” a ti.

Dan chung a leng an ni lo tih erawh hre thar leh tura chahin, ” Dik tak leh huai takin ruihhlo i do ang u. Ruihhlo kan do hi kan thawk thlawn lo. A la tivelo ten an tih loh nan, inzirtirna tam zawk kan neih a ngai. Zaninah hian ruihhlo zuarte ka chah duh chu, mi chhungkua nasa takin in tibuai a. zanin atang hian inruihhlo zawrh lo sim tur leh eizawnna dang lo ngaihtuah tur in ka chah che u. Zanin a lokalkhawm te pawh awm mai mai thei kan ni lo,” tiin theihtawp chhuah a ruihhlo do turin a sawm.

Kumpuan hawnna inkhawmah hian Central YLA hruaitute sawm an nih angin JH Lalrindika, General Secretary-in thu tawi a sawi.

He hunah hian Central YMA chuan ruihhlo ngaite enkawlna neitu, Lalruatpuii, Founder Operation Kingdom Ministry(OKM) leh TT Zohmingthanga, Tawngtai Bethel Camping Centre (TBCC) te hnenah chawimawina thuziak an hlan.

Kumpuan hawnna hunah hian Aizawl khawpui chhunga YMA branch 112 aiawh mi 6 theuh an tel.