News

Zanin (29.1.2026) Central YMA President R. Lalngheta chuan Bethlehem Vengthlang Branch YMA-ah kumpuan a hawng a, ruihhlo doah sorkar an phur thu leh ruihhlo zuar sim duh lote an pal dawn thu a sawi.

CYMA President chuan thu sawiin, “Pathianin YMA min hruai nasa hle a, Pathian malsawmna kan dawng a, hriat loh lam atangin tanpuina kan dawng nawlh nawlh mai. Tunah pawh hian Sub-Headquarters YMA-ten ruihhlo dona atana an hman tur motor kan dawng dawn a, tunah hian a lo thleng tawh. Hei bakah hian Mini-Sport Complex siamna tur pawh hmuh mai theih kan inring. Heng bakah hian Ruihlo dona tur sum thahnem tak kan hmuh hmel,” a ti.

Ruihlo do tur hian kan sorkar pawh a phurin, a inhawng hle tih sawiin R Lalngheta chuan, “Ruihhlo ngaite enkawlna tur kan hriat loh laiin TBCC an inhawng hlauh. Hetianga ruihhlo ngaite dahnan a kan Home hmante pawh sorkar lamin an theih ang angin an thuam tha dawn,” tiin an lawmawm tak zet thu a sawi.

Kan ram hi ram nuam a nih theih nan ruihhlo hi kan theih tawp a kan do a tul tih sawiin CYMA President chuan, “CYMA-in ruihhlo do turin Aizawl khawpui chhung hi zone-ah then kan tum a, kan then fel tep. Kan then fel hunah mahni zone-ah theuh thahnem ngai tak a thawk turin ka sawm che u ni,” a ti.

CYMA President chuan uihhlo do kawngah kohhrante nena thawhho a tul tih sawiin, “Chumi tur chuan hma kan la dawn. Ruihhlo kalkawng kan ni a, ruihhlo zuarte pawh an sim duh loh chuan kan pal ang. Kan tih loh chuan kan tu kan faten min la dem ang, tute maw kut a dah loin keimahni tih tur ah i dah ang u,” tiin dik lo taka sum la lut thinte hnawl ngam turin YMA member-te a sawm.

Ruihhlo do hi Pathian duh zawng leh ram leh hnam damna tur a nih thu sawiin R Lalngheta chuan, “Chuvangin kan tanrual a ngai. Amaherawhchu, ruihhlo do tute hi kan kut a fai a ngai, hluihlawn thil kan la tur a ni lo. Pathian tih chungin ruihhlo i do ang u,” a ti.