Ruihhlo doin duty tan

Vawiin (11.12.2025) tlai dar 3:30 khan Central YMA chuan YMA kumpuan ‘Ruihhlo Do’ bawhzuina atan an duty an tan.

Duty bul tanna hun tawi hmangin CYMA Vice President Prof. Lalnuntluanga, Kumpuan Chairman ni bawkin a kaihruai a, CYMA Asst. Secretary SF David Ngursangzuala chuan Kumpuan Committee member-te inhmelhriattirna hun a hmang.

Duty tannaah CYMA President R Lalngheta chuan, “Hunpui kan hma chhawn mekah ruihhlo a hluar chhoh zel avangin ruihhlo do kawngah theihtawp kan chhuah tlan a ngai a. Keimahni ruihhlo dotute hi ruihhlo lakah kan fihlim a ngai a, tha thlah thei kan ni lo,” a ti.

Polite tak si khawng tak si in an thawk dawn tih sawiin CYMA President chuan, “Ram leh hnam thatna turin theih tawp chhuahin fimkhur tak in kan kal dawn nia. Ruihhlo man danah pawh dan ang thlapa man a ngai ang,” tiin ruihhlo zuar sim duh lohte dim an tum loh thu a sawi

Central YMA hian zanin atangin ruihhlo do beihpui an thlak tan a, ruihlo ngai an mante TBCC ah dah zel an tum.