Oct 31, 2025
Friday
Dampa Bial By-Election neih tura October 29-31, 2025 chhunga West Phaileng tlawhtu ZPM Adviser Lalnghinglova Hmar, Minister of State chuan tun ni hnih chhungin West Phailengah ZPM zawm thar mi 33 a lawm lut niin ZPM chuan thuchhuah siamin am tarlang.
ZPM-in West Phaileng khua vil tura an ruat Lalnghinglova Hmar hian October 30 khan Phaileng Unit I campaign office a hawn naah thu sawiin, “ZPM-in tunah hian kum thum chhung ro kan la rel dawn a, Pathian zarah inthlan lo awm leh turah pawh chak zel kan inbeisei. Dampa Bial leh Phaileng khua pawh hi chu ZPM sorkarna vawnfung chelhtu lama ṭang turin ka sawm a che u,” tiin ruling party lama vote turin a sawm.
Lalnghinglova Hmar chuan Phaileng mipuite chu an khaw pa Vanlalsailova vote tura sawmin, “Tun hi Phaileng tán ṭan rual hun a ni a, kum 100 zeta upa khaw lian takin mahni khaw pa ngei MLA-a a neih theihna remchang a inhawng. Neutral leh party dangte hial pawh ZPM candidate min vote-pui turin kan sawm a che u,” a ti.
