Runway hnathawk mek endik

Nizan (2.12.2025) khan Chief Minister leh PWD Minister hriatpuinain Dy. Speaker Lalfamkima bakah PWD enkawlna-a Vanlalhlana puitu Adviser to CM (Technical) Ginzalala leh Lunglei West Bialtu MLA T Lalhlimpuiate chuan Lengpui Airport runway cheithat mek an enfiah.

ZPM tarlan danin, Lengpui Airport runway siamthat mek hi SASCI 2025-2026 Part-I AA hnuaiah ‘Upgradation of Lengpui Airport (Upgradation of Runway to PCN 50)’ tih a ni a, hnathawh nan cheng vaibelchhe 91 dah a ni.

Hna hi airport runway recarpeting (siamthat) lama sulhnu nei tha tak Brahma Infratech, Rajasthan ten an thawk mek a, chhun lamah hna a thawh theih loh avangin zan khatah a tlangpuiin 2500-2800 square meters an thawk hman thin.

Chhun lama thlawhtheihna a tum leh theihna turin zingkarah PWD-ten quality test an nei ziah a, chu chu Air Traffic Controller (ATC) in a pawmpui leh vek a ngai a ni.

November 10, 2025 atang khan hna hi thawh tan a ni a, April 2026-ah thawh zawh tum a ni. Lengpui Airport Runway siamthat hnuhnung ber hi 36 PCN-in kum 2020 khan siam a lo ni tawh a, tunah hian 50 PCN chung lam ni turin siam mek a ni. Thlawhtheihna lian zawk pawh tum thei tura beisei a ni.

Tum danga runway siamthat ang loin, technology sang zawk, German Company siam Milling Machine hmangin 150 mm thickness-in runway pumpui hi mill chhuah vek a ni dawn a, 170 mm-a chhahin a thara siam tur a ni.