News

Tunhnaia social media-a Assam lam mi thenkhatin Saipum ram chhunga lo vata hma an la nia thehdarh a nih chungchang bawhzuiin, nimin (11.3.2026) khan Kolasib Bawrhsap Robert C. Lalhmangaiha leh Kolasib SP Pu Lalrinpuia Varte chuan Saipum khua tlawhin, he harsatna thleng chungchangah hian Saipum khawtlang hruaitute nen thil awm dan an sawiho.

He hunah hian Saipum khawtlang hruaitute chuan thil thlen dan tlangpui tarlangin, “Hnamdangten lo vah nana hmun an rawn ruahman hi a hma chuan Mizoram Sorkar hnuaia police-te duty-na thin, Chawilung Camp awmna hmun a ni. Kawng chhiat avanga he hmuna police duty-te an awm theih tak loh hnuah, venhimna hna a lo chak tawk ta lo chu remchangah lain Assam lam atang hian an rawn zuam ta niin kan ngai,” an ti.

Kolasib Bawrhsap chuan he thil thleng hi sorkar pawhin a ngaipawimawh hle tih sawiin, “Buaina leh inepna chhuak lova boruak muanawm tak hnuaia chinfel a nih theih dan kawng zawn chu thil tul hmasa a ni,” tiin a tul ang zela hma la turin sorkar a inhuam thu khawtlang hruaitute hi a hrilh.

Saipum khawtlang hruaitute chuan he hmun hi an ram, Saipum ram ngei a nih thu uar takin an sawi a, Assam lam atanga he hmalakna hi an kalpui tlang zel a nih chuan nakin zelah ramri buaina hlawm lian zawk a chhuah theih dawn thu Kolasib Bawrhsap hnenah hian an thlen a, sorkar chu a hma thei ang bera hma la turin an ngen.

Remna leh muanna nena he harsatna chinfel a nih theih dan tur kawng hrang hrang an sawiho nghal.

Hetihlai hian Chief Minister Lalduhoma chuan vawiin Assembly Session-ah he thil thleng chungchang hi sawi chhuakin, Assam-a Bru-te’n Assam Sorkar hriatpuina ni loin khawl hmang loin an lo vat tih a hmuna kalte’n an report thu sawiin, “Rawn vat tawh lo tura tih an ni a, an lo vah tawh loh kan beisei,” a ti.