Sava bo hmuh a la ni lo

Ni 29.10.2025 zing atanga Aizawl Zoological Park atanga bo Pesquet’s Parrot chu hmuh a la ni loa, FIR an dawn bawhzuiin Sairang Police-in an chhui mek.

Sairang Police-te hian Aizawl Sahuana thawkte thu an zawtfiah mek a, a tahtawlin an zawt chho zel dawn. Rinhlelh man an la nei lo. Police uisathiam pawh sahuanah hruai a ni tawh a, an dahna hmuna sava thla tla chu hnim tirin an chhuitir a, a damloh laia an dahna thin thleng bak a chhui thei lo. Heivang hian a rutute hian sava hi bag-ah an ak daih nia rin a ni.

Pesquets Parrot hi dan loa tawlh ruk tum an man niin, a tirah pahnih an ni. February 2024 khan Aizawl Sahuanag dahluh an ni a, pakhat zawk a thi. Pakhat zawk pawh a damlo reng a, thla khat vel chiah mipui hmuh theih tura pho chhuah a la ni. Ni 29.10.2025 zing dar 8:35-ah rukbo a ni tih hriat a ni.

Aizawl Wildlife Division tarlan danin, Pesquet’s Parrot rukbo hun hi ni 28.10.2025 tlai lam dar 4:00 atanga nimin zing lam dar 7:00 inkar nia hriat a ni.

He case hi theihtawp chhuaha bawhzui zel a ni a, a chhui zuina atana tangkai thei tur information min pe thei an awm a nih chuan ‘The Mizoram Rewards for Detection of Forest and Wildlife Offence Scheme 2019’ in a phal angin lawmman Rs. 20,000/- pek an ni dawn. An nihna (identity) thupsak tlat an ni ang. Information pek theihnate mobile phone number – 8974436843 / 8414012905 / 9862347339 / 8014343542 (with Whatsapp)