Saza peltua puh jail-ah dah

Nimin (7.1.2026) khan Aizawl Forest Division hnuaia Seling leh Saitual Range tangkawpte chuan an report dawn bawhzuiin, Saza sa leh a peltu an man.

Sa peltua puh hi Sesawng khaw mi niin, Forest Department-te hian an report dawn bawhzuiin a in leh a chhehvel an dap a, Saza sa leh pawihkhawihna atana a hman hmanrua te an man. Vawiin hian thubuai siamsak niin, Central Jail-ah dahluh nghal a ni.

Sa peltu nia puh man tak hian phalna tel lova Saza a lo pelh avang leh a sa te phalna tel lova a lo kawl avang hian The Wildlife (Protection) Act Section 9, Section 39(1)(b) leh Section 39(3) te a bawhchhia a; Saza hi The Wildlife (Protection) Act, 1972 hnuaia Schedule 1 ramsa zinga mi a nih avangin Section 51(1) behchhanin hremna na tak – lung in kum 3 aia tlem lo, kum 7 thleng tan theihna leh pawisa fai cheng ₹25,000/- thleng chawi theihna a ni.

Mizoram State Animal Saza hi humhalh tura tan lak a nih mek laia hetiang pawikhawihna a thleng thin hi Forest Department chuan pawi a ti a, Zoram mipuite nungcha leh ramngaw humhalh kawnga hma sawn zel turin a ngen a ni.