News

Vawiin (1.6.2026) chhun khan Planning Conference Hall-ah SNA SPARSH hmangtu department administrative head-te pualin SASCI & SNA SPARSH chungchangah meeting cum workshop buatsaih a ni a, Finance enkawltu Chief Minister Lalduhoma’n a telpui.

Chief Minister chuan technology thar lo chhuak zelah central fund kan dawn dan leh a hman dan kalphung pawh a lo changkang ve zel, “Hei hi awlsamna min thlentu tur an ni. SNA SPARSH pawh hi kan sum hnar lian ber kan kalpuina a nih angin a hmangtu department ten chiang taka kan hriat a tul. Kum liam ta aia kuminah tha zawka kan kalpui theih nan meeting cum workshop pawh hi kan buatsaih a ni,” a ti.

Nikum khan an thawhhona a that avangin SASCI Part 9 ah Efficiency in Financial Management Incentives cheng vbc. 350 an dawn thu sawiin Lalduhoma chuan, “Kuminah hian SASCI part tina reform-link incentive awm zawng zawngte dawng thei khawpa tan lak kan duh. Chutianga kan kal theih nan chuan Mizoram sorkar chuan Administrative Head zawng zawngte chu Charter of Financial Advisers hnuaiah (financial power) thuneihna pek an ni,” tiin ruahmanna thar chuan administrative approval leh expenditure sanction pek chhuah kawngah awlsamna a thlen dawn thu a sawi.

Chief Minister chuan, “Kum hmasa lam atanga an tawn hriat pawimawh tak chu mother sanction an hmuh tawh chuan a hun taka pawisa hman chhuah a, a hun taka kan SNA SPARSH Account kan khar (close) theih a ngai, tih hi a ni. Administrative head-ten a hun taka utilization certificates kan peih ngei ngei a ngai tihna a ni. Lo inpeih thlap zel turin kan chah che u. SASCI Part 9 kalpui dan tharah Direct Benefit Transfer (DBT) zela scheme tinte kan kalpui a ngai dawn a, State Welfare Scheme pawh a huam vek a; department zawng zawngin DBT mode kan hman vek a ngai tih hria ang u,” a ti.

Tun SASCI kal mek (2026-27) a Part 4 leh Part 9 ah hian Mizoram tana incentive (thawh that vanga dawn belh theih) hmuh theih cheng vbc. 650 a awm thu sawiin, “Kan state tana thatpui dawrh theih thil a nih avangin hmu thei ngei turin kan tang tlang dawn nia,” tiin workshop tangkai taka hmang turin a chah.

He workshop hi Institute of Government Accounts & Finance leh Mizoram sorkar Finance Department te tangkawpin an buatsaih a ni a, a hawnna neih zawhah mithiamten zirtirna an pe zui a ni.