Sorkar leh HPC-D (LF) ten MoS an ziak

Mizoram Sorkar leh Mizoram Sorkar leh Hmar People’s Convention-Democratic (Lalhmingthanga Sanate’s Faction) te chuan vawiin (14.4.2026) hian Vengpui Community Hall, Sakawrdaiah memorandum of settlement (MoS) an ziakfel. MoS ah hian Mizoram Sorkar aiawhin Home Secretary David Lalthantluanga leh HPC-D (LF) aiawhin an president Lalhminga Sanate in hming an ziak.

MoS ziah inkhawm hmanpuitu Adviser to Chief Minister (Political) Lalmuanpuia Punte chuan inremna hian hmasawnna hnathawh a keng tel tih sawiin, “A hlawhtlinna tluantling kan hmuh ngei ka beisei a ni. HPC leh HPC-D te nen inremna ziah a nih khan Aizawl khawpuiah mi tlemte hriatpuiin kan ziak a, tun tumah Sakawrdaiah mipui hriatpui leh hmuhpuiin inremna kan ziak hi a lawmawm a, hnam bil helpawl Mizoramah an awm tawh lo niin kan hria hi ka lawm takzet a ni,” a ti.

Mizoram sawrkar aiawha thusawitu Home Secretary David Lalthantluanga chuan Mizoramin remna leh muanna kawnga rahbi thar kan kai hi chu a lawmawmin a hlu takzet tih sawiin, “HPC hi kum 1986 ah a piang a, 1994 ah remna thuthlung ziahpui an ni. Kum 2018 ah HPC atanga peng chhuak HPC (D) te nen inremna thuthlung ziah a ni leh a, vawiin niah peng dang leh HPC-D (LF) te nen inremna ziah a ni leh a ni,” a ti a, Mizorama ralthuam keng hel pawl an awm tawh lo chu a thlamuanthlak thu a sawi.

Thusawitu dang HPC-D (LF) President Lalhmingthanga Sanate chuan kum 33 chhung an ralmu tih sawiin, “Inremna thleng tur hian thil tam tak kan chân a ni. Chief Minister, Home Minister, Adviser to CM bakah Home Department officialte chungah lawmthu ka sawi a ni. Kan duhthusam ang tak inremna a ni lo chungin lungawi tawn theihna tur thil a ni hi a lawmawm. Hmar tlangdung hmasawnna tur Mizoram Sorkarin a ngaihsak dawn a ni tih rinna nen nunphung pangngai zawm turin kan rawn chhuak a ni. Inremna thuthlung tihlawhtling turin theihtawp kan chhuah dawn,” a ti.

Ruahman lawk dan chuan Hmar People’s Convention-Democratic (Lalhmingthanga Sanate’s Faction) mi leh sa 43 te tan Mizoram Sorkar chuan April 30, 2026 (Ningani) hian CTI, Sesawng-ah Laying of Arms Ceremony (silai tun inkhawm) a buatsaih dawn a ni.