Sorkar nghet tak siam turin kan inzuar &#8211; K Sapdanga

LADC inthlan lo awm tur atana campaign-a feh chhuak, minister K Sapdanga chuan vawiin (26.11.2025) hian Sangau khua leh a chhevela khaw hrang hrang a tlawh a, sorkar nghet tak siam tura an inzawrh mek thu leh kuthnathawktute tan chuan an at ngam zel tur thu a sawi.

K Sapdanga chuan, “LADC-ah sorkar nghelnghet ding thei loin, Lai mipuite hrehawm tih khawpin kan aiawha kan thlanchhuahte sorkarna fawng chelh tumin an thle tawn thin. Hetianga kan hruaitute an awm fo chuan hmasawnna hnathawh tur hmachhawp hrang hrangte pawhin a tawrh phah fo thin a, chung chu mipuiin an tuar ta thin a ni,” a ti.

State-ah sorkar nghelnghet tak ZPM-in an siam mek thu sawiin K Sapdanga chuan, “LADC-ah pawh sorkar nghet tak siam turin kan inzuar mek a ni. District council chakna ringawt chuan hnathawh a theih lohzia hrechiangtu in ni. State sorkar thlawh khumin hma a lak tak tak theih loh,” tiin state sorkar nena thawk dun tur, hma la dun thei tur thlan chhuah a pawimawh thu a sawi.

K Sapdanga chuan tunah hian politics chhungril tak tak Zoram mipuiten an luhchilh mek tih sawiin, “Party indona ni loin intodelh leh intodelh lohah mipui kan inchuh mek a, Mizorama kuthnathawktu tam zawk ten Lo an neih paha an thlai chin ve theih sawhthing avangin chhungkaw tamtak an lawm mek a ni,” a ti.

K Sapdanga chuan khaw thenkhat chuan an khaw chanchina chhinchhiah tlak bik sum an lakluh avangin sorkar-ah lawmthu sawina sum an chhung let hial tawh nia sawiin, “ZPM-in thar lei chu kan sorkar kum khatna atangin kan kalpui a, inthlan dawn hnaiha flagship programe kalpui chauh thin party dangte chuan â min ti ngei ang,” tiin kuthnathawktute hamthatna tur a nih phawt an hotupa Lalduhoma hoin an ât ngam zel tur thu a sawi.