Sorkarin report thehlut

November 3,2025-a Chief Justice (Gauhati High Court) Ashutosh Kumar leh Justice Michael Zothankhuma-te thutna bench in thu a lo pek tawh angin Mizoram Sawrkar chuan Lengpui Airport siamṭhat leh tihchangtlun hna thawh mek chungchangah November 7, 2025 khan report a thehlut.

Thulaknain a tarlan danin, report chuan “Improvement/Upgradation of Operational and Non-Operational Facilities of Lengpui Airport(Renovation of Terminal Building)” project-a November 1, 2025-a an hmalakna chin a tarlang a ni.

Affidavit-a tarlan danin siamṭhat hna thawh tur tam tak chu zawhfel a ni tawh. A chhawng khatna chu 5,167.35 sq. m. a zau niin structural, flooring, ceiling, partition, plumbing, leh a dangte chu tihfel vek a ni tawh. Chutiang bawkin, ground floor chu 4468.99 sq. m.-a zau a ni a, check-in area 540 sq.m a zau tih loh chu khawih fel vek a ni tawh a ni.

Hna hmabak hi check-in area chei thar leh toilet block thar siam a ni. Amaherawhchu, check-in counter hi first floor-a an hmun ruat thara sawn a nih hma loh chuan khawih tan thei a ni rih lo. Heng hna la awmte hi tihfel a nih theih nan thla thum vel a ngai dawn niin an chhut a Sawrkar chuan February 28, 2026 hmain project pumpui hi zawhfel a nih theih an beisei a ni.

KR Construction lam pawhin court hian a hna thawhchin affidavit hmanga sawifiah tura a tih angin March, 2025 atangin department lamin an thawh tawh thu a sawi.

July 3, 2025-a court in thu a lo chhuah tawh angin respondent no. 6(second contractor) hnenah court a insawifiah tura notice pek tawh ni mah se court hmaah a la inlan lo. Court chuan a lungawi lohna lan tirin contractor lakah warrant of arrest (bailable) thu a chhuah hmanga court leh ah chuan inlan ngei turin a hriattir. He thubuai hi November 18,2025-ah ngaihtuah leh turin ruat a ni a.

Lengpui Airport chei that nan hian sawrkarin Rs 19,58,99,822/- a dah. Airport hi chei that a nih mek laiin ni 10 March, 2022 an slab a chim. A satuten an hna an thawk tha tawk lo tiin High Court-in airport chei hna hi vil zui se tiin Vanramchhuangi hian PIL hi High Court ah ni 12.7.2022 khan a pu lut a ni.

(Kan thulakna hi kan dil thlap a, a duh dan angin credit kan pe lo – Bengvarna)