Sorkarna siam turin ZPM nen inremna kan ziak &#8211; C Ngunlianchunga

LADC inthlan neih zawh taka MDC atana tling thar, MPCC Vice President C Ngunlianchunga, MLA chuan sorkarna siam turin ZPM nen inremna an ziah thu a sawi.

C Ngunlianchunga hian vawiin (15.12.2025) chhun khan Congress Bhavan-ah thu sawiin, “Helaia kan rawn kal hian sawrkar mai turin kan rawn kal. Mah se, van hmuna thlarau sual hote avangin kan sawrkar dawn nge, dawn lo kan hre ta lo. Sawrkar siam tur hian ZPM-te nen agreement kan siam a, sawrkar siam dan turte pawh agreement-ah kan ziak vek a ni,” a ti.

Social Media-ah khan ‘Congress-in MNF an bum a, ZPM-in Congress an bum ve thung’ tih post a hmuh thu sawiin C Ngunlianchunga chuan, “ZPM hian min bum kan hre loa, kan inremna a tawp tih pawh kan la hre lo a ni. MNF-te nen khan inthlan hma khan inremna kan nei a, kha kan inremna ah khan inthlan hma chauh nise, inthlan hnu lam chu la sawi that leh turin kan ti a ni. Kei ngei pawhin inthlan hma khan Congress candidate awm lohnaah chuan MNF candidate vote turin ka ti a ni. Mahse social media-ah chuan MNF vote vek turin ka ti ni awmin an sawi leh a, chutiangin ka ti lo a ni. MNF hi kan bum lo,” tiin inthlan result puan hnuah pawh MNF nen an inbiak thu a sawi.

MNF nen an inbiak laiin ZPM-ten an dawr thu sawiin C Ngunlianchunga chuan, “Kan hotute nen kan sawiho hnuin ZPM-te nen chuan agreement kan siam thei ta a ni. Tunah hian kan agreement kha a tawp tih pawh kan la hre loa, enge lo thleng zel dawn kan hre lo. Kei hian hetia kan inbiakna ah hian leader ka claim loa, ka claim ngai lo a ni. CEM ka nih dawn pawhin ka claim loa, minister ka nih dawn pawhin ka claim lo a ni. MDC din hi ka tum lova, MLA nilai ka ding a ka tla anih chuan a mualphothlak hle dawn. Kan party atang kan pafa a ding tura nawrna a nasa em em a, chhungkua kan inrawn a, kan tawngtai a, ding lo turin thu kan titlu. MDC Candidate tur te pawh kan President in thuneihna min pek angin ka approve a ni nghe nghe. ZPM-in Vengpui Candidate an han puang kha veng chhung mi, party hrang hrang atang khan ding tura min nawrna a nasa em em a, kan hnar thei ta lo a ni,” a ti.