News

All Mizoram Commercial Tipper Association Owner’s and Driver’s (AMCTA), Mizoram Tipper Association (MTA) Gen. Hqrs., Aizawl leh MTA Kolasib District intelkhawmna MTA Joint Committee-te chu nimin (1.8.2026) atang khan state dang atanga balu phurluh tur dang turin an duty tan.

Thudawn danin, MTA Joint Committee-te hi MTA Site Office, Phunchawng leh Kolasibah duty-in balu phurte chu an challan an lo endik sak zel a ni. He thuziahlai thleng hi chuan state dang atanga balu phurhluh dan ngai an la awm loa, an duty chen tur hriat a la ni lo. Vawiinah pawh duty in mi eng emaw zat an thawk chhuak.

MTA Joint Committee hruaitute chuan July 27, 2026 khan Aizawl Press Club-ah press conference neiin, state dang aṭanga balu phur lirthei Mizorama lut tur an dang dawn tih an puang a ni.

MTA Joint Committee hruaitute chuan state dang, a bikin Assam-a Bagha balu lak luh kawngah Mizote’n harsatna an tawh nasat thu sawiin, ‘Tun hnai khan Bagha balu thiara Mizoram a\anga kal, balu man an inpek vek hnua Assam Police-te’n dan loa balu phura puhin mi pali an man,” an ti a, hnam dangte chu an inthurual nia an hriat thu leh sum tam tak chawitir an nih thu an sawi.

Mizoramah intodelhna tham balu a awm nia sawiin MTA Joint Committee hruaitute chuan, “Hnamdangte hian sumdawnnaah Mizote min chîmral mek. Balu hi Mizoram hian kan ngah a, Langkaih balu thate pawh hnam dang pe lo tur leh Mizote chauh phurhtir turin a pump/la chhuaktute kan be tawh. Tuna kan harsatna chu, balu phurh chhuahna tur kawng mumal lo leh chhia a ni,” an ti.

MTA Joint Committee hruaitute chuan, Assam balu chu Bagha, Bairabi leh Langkaih tlangdung atangin Mizorama a rawn lut tih sawiin, “Tax invoice chawi loin an rawn sumdawng a, chu chu tlawhchhana hmangin dan hmangin kan dang dawn. State pawn atanga rawn lut hrim hrim hi engtikah mah rawn lut tawh lo tura hmalak kan tum,” an ti a; an hmalaknain awmzia a neih loh chuan tharum nena hmalak an inhuam thu an sawi.