Jun 04, 2026
Thursday
MPCC Treasurer Dr. Lalmalsawma Nghaka, AMC corporator chuan vawiin (4.3.2026) hian Hnahlan khua tlawhin, Champhai North Congress Block-II huamchhunga Congress worker-te nen Hnahlan VO Hall-ah an inkawm.
Congress worker-te hmaah thu sawiin Dr.Lalmalsawma Nghaka chuan, “Congress Party chuan mipuite dah pawimawh tak takna leh mipuite lainatna thinlung nen kan policy tur kan duang mek. Congress chuan duhsakna uchuak leh a thei falten sum siam tumna ringawt avanga restricted tender, departmental works leh work supervisor phuahchhawpte hi kan duh ve loa, kan hnawl dawn,” a ti.
MPCC Treasurer chuan health care chungchang sawiin, “Mi harsa berte leh mi nawlpui banphak turin kan hnûk hniam dawn. Health care pawh langtlang tak, bih chian ngam, zep ruk kual ngai thil awm loin kan kalpui dawn a ni,” tiin health care chu sumdawn nan ni lo, mipuite tan a chhenfak awma an siam dawn thu a sawi.
Chief Minister Lalduhoma’n Ngur-Vapar chunga tui khuah tur, sea plane pawh ṭum thei tur leh Champhai leh a chhehvel khuate pawh tuia chawm thei tura a sawina hmun tlawhin Dr Lalmalsawma Nghaka chuan, “Kum 2 hnuah pawh kan CM thusawi bawhzuina hmuh tur a la awm lo hi a lungchhiat thlak,” a ti.
MPCC Treasurer chuan, “Ruahsur miah lo mah se, Champhai leh a chhevel khua te kum 2 chhung tuia an hnianghnar theihna tur project ropui tak CM meuh pawhin tihtakzeta a sawi chhuah tawh chu bawngtuthlawh cheh khat pawh chehna hnuhma a la awm lo tih kan hmu,” tiin Mizoram CM meuh thusawi bawhzuina a awm lo chu CM zah lohna nia a hriat thu a sawi.
