Synod kutah GAC building hlan

Vawiin (23.6.2026) hian Mizoram Sorkar chuan Mizoram Synod kutah Govt. Aizawl College building, Sikukpuikawna mi an hlan.

Building hlan puala Planning Conference Hall-a inkhawm buatsaih chu Higher & Technical Education Secretary Dr. Lalrozama’n a kaihruai a, H&TE Director Lalṭanpuia’n report a pe a, H&TE Minister Dr. Vanlalthlana bakah Mizoram Synod aiawhin Rev. V.L. Luaia Hranleh, Senior Executive Secretary leh Rev. Dr. Rosiamliana Tochhawng, Executive Secretary-ten thu an sawi.

Govt. Aizawl College building man atan hian sawrkarin a phut angin Rs. 3,18,92,300 chu Mizoram Synod hian a hlan nghal a ni.

Aizawl College hi August 25, 1975-ah din a ni. Building nei mumal loin hmun hrang hrangah class neih ṭhin a ni a, rei fe deficit status-a awmin 1989-ah provincialize a ni a, Sikulpui leh Sikulsen-te Sawrkar kuta a awm laiin a compound-ah hian Govt. Aizawl College building sak a ni.

January 7, 2026 khan Dr. Vanlalthlana hnuaiah department aiawhte leh Mizoram Synod aiawhten building inhlan chungchang an ngaihtuah a, chutah chuan drafting committee din a ni. Drafting committee chuan hma la nghalin building inhlanna hun hi hman a lo ni ta a ni.

May 29, 2019 khan Mizoram Synod kutah Sikulpui pawh hlan a lo ni tawh a ni.