News

Mizoram Police chuan thuchhuah siamin, Marina Lalchhanchhuahi (26) d/o Joseph Malsawma (L), Tanhril Vengpui thah a nih chungchangah a hnuaia tarlan ang hian thuchhuah an siam.

Mizoram Police thuchhuah :

Zonuam Outpost-ah ni 03.12.2025, 08:30AM ah John Sanghnuna, Tanhril Vengpui hnen atangin a tunu Marina Lalchhanchhuahi (26) d/o Joseph Malsawma (L), Tanhril Vengpui, Aizawl chu ni 01.12.2025 dar 11:30 AM ah an chenna in atanga mamawh lam tura a chhuak chu ni 03.12.2025 thlengin a la haw loh thu report dawn a ni a, chumi avangin hma laksak turin a ngen. Zonuam Police Outpost General Diary-ah mibo report ziahluh niin theihtawpa zawnpui nghal a ni.

Mibo ni a report Marina Lalchhanchhuahi (26) chu ni 04.12.2025 – 12.12.2025 chhung hian Police leh Tanhril khawtlangte nen tangkawpin theihtawp chhuaha zawn a ni a. Hetia mibo zawn hna kalpui a nihlai hian Marina Lalchhanchhuahi Mobile Phone SIM No.6909104207/8259895917 chu a Call Detail Report (CDR) te lain uluk taka zirchian a ni a. CDR atanga a biak thinte chu thuzawhfiah an ni. CDR atanga a lan danin Marina Lalchhanchhuahi a bo ni hian a biak mi pakhat chu uluk taka thu zawhfiah a ni. Nimahsela, Marina bo chungchangah hian evidence tha a awm loh avangin chhuah leh a ni

Marina Lalchhanchhuahi zawn hna kalpui a nih mek lain, Ni 13.12.2025 05:25 PM-ah RS Lalrinsanga, Tanhril Branch YMA hnen atangin MZU Football Playground bulah hmeichhe ruang ni awmtak an hmuh thu leh he ruang an hmuh hi mibo zawn mek Marina Lalchhanchhuahi a nih ngei rin a nih thu Zonuam Police Outpost-ah dawn a ni. Chanchin hriat a nih veleh ruanghmuhna hmun chu Police team-in pan nghalin, Forensic Team-te pawh hrilh hriat nghal an ni. Ruang awmna hi MZU football playground atanga 50 metres bawr velah niin a lo tawih chhe tan tawh.

Inquest uluk taka neih niin, Forensic expert-ten uluk takin ruang endik hna an thawk. Vanlalrovi, Tanhril Vengpui chuan ruang chhar chu a fanu bo mek Marina Lalchhanchhuahi a nih ngei thu a finfiaha ni. Police inquest atanga a lan danin, ruang chhar chu a chhiat tawh avangin leh pawn lam lang thei ah hliam hnuhma engmah a hmuh theih loh avangin a thih chhan diktak hriat a ni lo. Hetiang a nih avang hian ruang chu Civil Hospital, Aizawlah ni 14.12.2025 khan a thih chhan chiang taka finfiah a nih theih nan Post Mortem Examination tura thawn a ni. Hemi chungchangah hian Vaivakawn Police Station-ah Unnatural Death (UD) case register niin, uluk taka a thih chhan chhui zui a ni.

Marina Lalchhanchhuahi thihna chungchanga enquiry neih a nih lai hian, mi eng emaw zat thu zawhfiah an ni. Enquiry atanga alan danin, Marina Lalchhanchhuahi hian nau a pai mek thu hriat a ni a, amaherawhchu a fa paina erawh hriat a ni lo. Marina Lalchhanchhuahi hian pasal neih a tum thu leh a pasal tur chu pa upa lam, Pensioner a nih thute thuhretu hnen atangin hriat a ni. Tin, Marina-i’n he a pasal tura a sawi hi Tanhril Veng khua leh tui diktak a nih loh thu pawh hriat a ni.

Marina Lalchhanchhuahi thihna chungchanga enquiry-ah rinhlelh pakhat chu Zonuam Police Outpost-ah ni 16.12.2025 khan koh a ni. Hetih mek lai hian RL Peka chu a chenna in atanga a zuan thlak thu leh Ebenezer Hospital panpui a nih thu dawn a ni. Rang takin Ebenezer Hospital, Chawnpui pan nghal a ni a, FSL Team-te nen RL Peka motor B/R No. MZ-01S-4967 (TATA Nexon) chu rinhlelh thilah hriatpuitute hmuh laiin uluk taka motor chhung chu enfiah a ni a, motor chhung hmun hrang hrangah thisen kai ni ngei a rin chu
hmuh a ni. Hnuchhuina kalzel ah FSL expert team te endik atan seized a ni ta a ni.

Tin, RL Peka chu Marina Lalchhanchhuahi thihna chungchanga inhnamhnawih ngei ni a rin a nih avangin an chenna in chu ‘Ground of belief’ siamin enfiah a ni. RL Peka phone hman lai Redmi 8A chu an chenna in atangin seized a ni a, Forensic Science & Laboratory, Aizawlah enfiah tura thawn a ni.

Police Enquiry-ah hian Marina-i mobile phone SIM Number 6909104207 Call Detail Report (CDR) chu zirchian that leh niin, Marina-i be hnuhnung bertu chu SIM No.7627949735 niin a biak hun hi Dt. 01.12.2025 dar 11:40 Am ani a, he SIM No. 7627949735 neitu hi RL Peka, Tanhril Vengpui a in sa mek leh Kolasib atanga lo pem mi in luah a khawsa mek a ni tih hriat a ni. Hmun hrang hranga CCTV/surveillance camera awm ang angte enfiah niin, hetah hian TATA Nexon var (B/R No. MZ-01S-4967) chu Marina-i ruangchharna MZU campus, Tanhril ah ni 01.12.2025 khan a tlanlut ngei a ni tih finfiah a ni a, he motor hi MZU campus ah darkar 2 leh 18 minutes chhung a awm tih hriat a ni bawk.

Marina-i thihna chungchangah hian rinhlelh kai ber a nih avangin uluk taka zirchian zui zel a ni. He lirthei B/R No. MZ-01S-4967 (TATA Nexon) hi Echallan apps atanga a lan danin, Lalduhsaka Lelhchhun, Maubawk hminga registered niin, ni 21.10.2023 khan 3rd ownership nei mektu Joseph Lalremmawia s/o RL Peka, Kolasib hnenah Rs.5,80,000/- (nuai nga singriat) a hralh chhawn a ni.

Marina Lalchhanchhuahi thihna chungchanga hnuchhuina kal zelah, ruang chharna hmun atang hian, Marina Lalchhanchhuahi nghawngruh ni ngei a rin leh a ha 8 leh thisen ni ngei a rinte chu hmuhchhuah a ni. Tichuan, a chunga tarlan motor chhunga thisen ni ngei a rin leh a ruang chharna hmuna evidence lakkhawmte chu Forensic Science & Laboratory, Aizawl ah endik turin thawn nghal a ni.

Hriatpuitu leh evidence chi hrang hrang lakkhawm endikna atanga a lan danin, Marina Lalchhanchhuahi thihna chungchangah hian sualna kawnga pawikhawihna (criminal offence) awm ngeia hriat a nih avangin Vaivakawn Police Station-ah tualthah thubuai ziahluh (Vaivakawn PS C/No.08/26 Dt.17.01.2026 U/S 103(1) BNS) a ni ta a ni.

Hnuchhuina kalzelah evidence chi hrang hrang Forensic Science & Laboratory, Aizawl-a thawnte chu ni 23.01.2026 hian evidence examination report dawn a ni. Examination report atanga a lan danin, RL Peka motor chhunga thisen kaite chu Marina Lalchhanchhuahi thisen ngei a nih thu leh ruang chharna hmuna ha hmuhte pawh Marina Lalchhanchhuahi ha ngei a nih thu finfiah a ni bawk. Tin, RL Peka mobile phone Redmi 8A examination report chu Forensic Science & Laboratory, Aizawl atangin dawn a ni bawk. Report atanga a lan danin, RL Peka hian a phone Redmi 8A ah hian Marina Lalchhanchhuahi hming leh contact number – 8259895917 chu ‘TNHRL MAR’ tiin a saved tih hmuhchhuah a ni.

Ni 12.11.2025 khan RL Peka phone-ah hian ‘Pregnancy Test Kit’ thlalak hmuh chhuah a ni bawk a ni. Marina Lalchhanchhuahi tualthihna chungchanga hnuchhuina kawng
hrang hranga atanga lo lang chu RL Peka, kum 62 (L) s/o RL Dama (L), Tanhril Vengpui, Aizawl hi pawikhawihtu leh mawhphurtu ber niin hmuhchhuah a ni.

He hnuchuinaah hian Tanhril YMA leh FSL team-ten Police-te theihtawp chhuah a min puihna avangin an chungah SP Aizawl District leh a staff-te chuan lawmthu an sawi a ni.