Tetea Hmar-in NITI Aayog officer-te a kawm

October thlaa Mizorama Tourism Conclave neih tur leh, chumi inbuatsaihna’n a New Delhi-a pre-conclave meeting neih tur chungchangah vawiin (24.4.2026) chawhma khan Tourism Minister Lalnghinglova Hmar leh NITI Aayog officer-te chu Chanakyapuri, New Delhi-a Mizoram House-ah an inkawm a, Conclave hlawhtling leh Mizoramin a hlawkpui ngei tur buatsaih tura hmalak ho dan tur an sawiho. NITI Aayog officer-te hi Dy. Director General Swapnalee Bhattacharya-i’n a ho.

Lalnghinglova Hmar chuan Sairang thleng rel a luh hnuah Mizoram tlawhtu an pung nasa tih sawiin, “Sairang thleng rel a luh hnuah Mizoram tlawhtu chu chawhrualin thlakhatah nuai khat an chuang tawh a, thlawhtheihna leh rela inkalpawhna a awlsam tawh avangin an pun zel kan ring. India rama thlasik khawpui (Winter Capital of India) ni thei turin hma kan la mek a, Mizoram tlawhtute rei zawk an châm theihna’n an tlawh tur leh tihtur tam zawk buatsaih kawngah hmalakna a kal mek a ni,” a ti.

Meeting-ah hian ‘pre-conclave meeting’ chu May, 2026 ah Vigyan Bhawan, New Delhi-ah neih nise tiin rel a ni. NITI Aayog leh Mizoram Sawrkar thawhho dan tur leh, meeting neih tur kaihhnawiha mawhphurhna hrang hrang insem dan turte sawiho a ni.

Pre-conclave ah hian Mizoram hmasawnna tur uluk taka ngaihtuahin, India rama tourism kaihhnawih industry langsar leh stakeholder dangte nen ‘brainstorming’ neih a ni ang a, chuta tanga hmalakna tur lo langte chu October-a Mizoram Tourism Conclave neih hunah a taka kalpui turin ruahmanna siam nise tih a ni. Conclave tihlawhtling thei tur mi pawimawh hrang hrang sawm tur leh, programme kimchang chu Mizoram Tourism department nen uluk zawka ennawn a thutlukna siam nise, an ti.