News

MPCC chuan vawiin (13.2.2026) chhun khan an office-ah chhung inkhawm an hmang a, thusawitu MPCC President Lal Thanzara chuan thalaite’n ZPM an enchhin suala an inhriat thu leh MNF sawrkarah Chief Minister leh vaipain airport contract an thawk dun nih awm thu a sawi.

Lal Thanzara chuan Congress Party-in kan ramah ro a rel loh chuan kan ram a ngaihtuahawm thin nia sawiin, “Term kalta MNF sawrkarah khan Chief Minister leh vaipain airport-ah contract an thawk dun a ni awm a, chu Chief Minister chu an hruaitu a la ni reng. Kan ram hruaitu a nih leh chuan kan ram a ngaihtuahawm hle dawn a ni,” a ti.

Tuna sawrkar lai ZPM hian inthlan hma khan, ‘party pahnih sawrkarna lo chang tawh ten kum 30 chhung khan engmah an lo ti lo’ tih kha auhlaah an hmang nia sawiin MPCC President chuan, “Thalai tam takin an awih a, an vote dual mai a nih kha. Tuna kan thlen chin an hria, thalai tam takin kan enchhin sualin an hria a, ‘kan vote tawh dawn lo’ an ti a ni,” tiin ZPM-in kan ram an hruai zel a nih chuan kan ngaihtuahawm hle dawn thu a sawi.