Thawhpui theih veng ni turin chah

Vawiin (21.3.2026) hian March 25, 2026-a Zemabawk West Local Council thlanna neih tur atan Zemabawk West Upa Pawl In Kawt, Mual 2-aah ZPM chuan Street Campaign an huaihawta, thusawitu Chief Minister Pu Lalduhoma chuan thawhpui theih veng leh sorkar nena hma la thei ni turin a chah.

Lalduhoma chuan local council nei thar tur Zemabawk West chuan mamawh tam tak an la neih thu a sawi a, “Kan thlanmual te, kawng te, hall te kan vote chhuak dawn a ni. Khawtlang aia party ti tlat kan awm lovin ka beisei a, party ‘feeling’ nena innawr vak loin thianghlim takin ‘campaign’ ila, khawtlang mamawh hre rengin mawi leh thianghlim takin lo awm turin ka chah a che u,” a ti.

ZPM Sorkar chuan malsawmna nasa tak a dawng tih sawiin Lalduhoma chuan, “Delhi malsawmna dawng turin thawhrimna leh thawh tam hi kan tih ve theih a ni. Thawhṭhat lawmman (incentive) kan dawng mawlh mawlh a ni. 16th Finance Commission-ah India hmarchhakah state dang te chang tlem ber ber an ni. Keini leh Assam-in kan dawng tam a, keini Mizoram phei chu India ram state leh UT zawng zawngah dawng ṭha palina kan ni,” tiin sorkar leh sorkar hnathawkte thawhṭhat avanga lawmman an dawn nasatzia a sawi.

Zemabawk West Local Council hian kumin March 25-ah LC member 5 an thlang ang a, local council thar an nei ve tawh dawn a ni.