News

Mizoram Tourism Service Association (MTSA) leh Tourism Staff Welfare Association (TSWA) chuan thuchhuah siamin, pension-a ni 30.4.2026 a chhuak R Lalrodingi sorkarin a ruai (re-employ) nawn chu lawmawm an tih thu an tarlang.

MTSA leh TSWA chuan an director ni lai R Lalrodingi chu North Eastern Council (NEC) ah hun rei tak tourism adviser hna lo thawk tawh a ni tih tarlangin, “Tourism Department chuan kawng hrang hrangin nasa takin hma a sawn phah in a hlawkpui takzet a ni. Central leh State Sorkarahte pawh hetiang a mibikte hi chu rawihnawn an ni fo thin,” an ti.

Sorkarah an director nilai chu rawih nawn a nih theihna atan nasa taka an ngen thu tarlangin MTSA leh TSWA chuan, “Kan ngennate sorkarin ngai pawimawhin min tihhlawhtlin sak a ni,” tiin an officer-ten qualifying service an neih hma atana director nilai R. Lalrodingi, May 1, 2026 atanga re-employ tura tih a lo nita chu lawmawm an tiin, an thlawp takzet tih an tarlang.

Hetihlai hian MZP chuan ni 7.5.2026 khan Aizawl Press Club-ah press conference neiin, Mizoram Sawrkar hnuaia hnathawk pension tawh rawih nawn (re-employment) tunhnaia awm chungchang an ngaihtuah thu sawiin, “Tunhma atangin MZP chuan pensioner rawih nawn hi nasa taka dodalin, duh lohna lantir a lo ni tawh thin a, tuna pensioner chungchangah pawh hian MZP ngaihdan ála ngai reng a ni,” an ti.

Sawrkar hnathawk ruai nawn lo tura thuneitute an ngen reng laia MZP ngenna ngai pawimawh lo a, sawrkarin a ruai nawn chu Mizoram mipuite leh thalai hna zawng mekte zah lohna leh hmusitnaah an ngaih thu sawiin MZP hruaitute chuan, pension rawih nawnna order chu May 14, 2026 (Ningani) ral hma ngeia sut turin Mizoram Sawrkar thuneitute an ngen a ni.

DP&AR chuan ni 24.4.2026 khan notification ti chhuakin, ni 30.4.2026 a pension a chhuak tur R Lalrodingi chu ni 1.5.2026 atangin OSD to CM leh Tourism Director atana rawih nawn a nih thu an tarlang a ni.