Tourism Dept leh Synod an inkawm

Vawiin (24.3.2026) tlai khan Tourism Minister Lalnghinglova Hmar hoin a office-ah Tourism Department hotute leh Mizoram Synod aiawhte an inkhawm a, Mizorama khualzin rawn pung zel lo dawnsawn kawnga thawhho dan tur an sawiho.

Tourism Minister chuan Mizoram tlawhtu pung zel chu thil lawmawm tak a nih rualin fimkhur taka lo dawnsawn a tul thu sawiin, “Mizoramah kum 2025 chhungin khualzin mi nuai 8 chuang an awm a, kuminah a aia tam an awm kan ring. Khualzinte hi lo kal belh zel se kan duh a, chutih rualin mi chi hrang hrang lo lut hian thil tha lo ken tel a nei thei a, chung laka lo inven leh dawnsawn kawngah nasa taka zirtirna kalpui a ngai,” a ti.

Lalnghinglova Hmar chuan Mizoram pawn atanga lo kalte hi a tam ber chu ring lo mi an nih angin, biakin chhung leh a chhehvela awm dan mawi te pawh inzirtir a ngai tih sawiin, kohhran hruaitute tan pawh ring lote hnena rawngbawlna hun tha a inhawn theih thu a sawi a ni.

Mizoram Synod aiawhte tourism-a hmalakna langsar tak awm mek chu lawmawm an tih thu an sawi a, “Hnamdang min tlawhtute’n nuam ti tak si, kan chenhona leh khawtlang nun zah tak sia hun an hman theih na’n sorkarin ruahmanna mumal tak neih pawimawh,” an ti.

Kan ram mawina leh khawtlang nuam tak kan neih – hmeichhiate tan a him, traffic dan zawm tha etc. chu Kristianna vanga kan neih a ni tih tarlan pawimawh an tih thu pawh Mizoram Synod aiawhte hian an sawi.

Inkawmhonaah hian thlasik boruak nuam leh Krismas bawr, khualzin tam zual lai chu a hlimhlawp lam bakah Chanchin Tha hrilhna remchanga hman theih tha tih a ni. Mizoram Sorkarin culture, adventure leh nature) lam hawiin tourism a kalpui mek thu leh, a bik takin ‘cultural tourism’ ah, Mizo culture leh Kristianna langsar zawka tarlan kawnga thawhho theih dante uluk taka sawiho a ni.

Khualzinte’n awlsam taka an chhiar theih turin Mizoram an cham chhunga hriat tur pawimawh hrang hrangte ziak a thehdarh tha an ti tlang.

Mizoram tourism-in hma a sawn theihna’n kohhran a inhawng a, an tangkai theihna leh sorkarin a mamawhna zawnah chuan thawhho an duh tih Mizoram Synod aiawhte chuan an sawi a, sorkarin kohhran hmalakna tura a beisei hrang hrangte chu inthlahrung hauh lova hrilh thin turin Tourism Department hotute an sawm a ni.

Tourism Minister ho hian Council of Churches in Mizoram leh Tourism fepartment aiawhte chu January 20, 2026 khan Mizoram tourism chungchang thlirhoin an lo inkawm tawh. Kohhran dangte leh NGO dangte nen pawh inrawnkhawmna hi neih zel tum a ni.