Tourism Minister leh kohhran hruaitute inkawm

Nimin (20.1.2026) khan Tourism Minister Lalnghinglova Hmar leh Council of Churches in Mizoram (CCM) hruaitute chuan tunhnaia Mizoram tourism chungchang Secretariat Conference Hall-ah an thlirho. Tourism Minister hi department official-te’n an tawiawm.

Tourism Minister chuan tunhnaiah Mizoramin khualzin a neih zat chu a pun nasat thu sawiin, “September thlaah Sairang thleng rel a lo lut a, a thla leh October thlaah Mizoram a khualzin lo lut zat chu mi sing kua an tling. Mizoram tlawhtu thahnem tak kan nei a, an la pun belh zel kan beisei bawk a, chumi tur pawh chuan Tourism department lamin hma kan la bawk a ni,” a ti.

Lalnghinglova Hmar chuan kan ram a khualzin rawn pun belh hian nghawng a nei lo thei lo tih sawiin, “Khualzinte hian kan ram mawina leh nawmnate hmuha hriat ve an duh. Chuvanga khualzin an rawn pun tak zelah chuan engtinnge kan lo dawnsawn ang tih kha ngaihtuah a ngai ta a ni,” tiin Mizoram a kohhran hrang hrang hruaitute nena thutkhawm a ngaih chhan a sawi.

Khualzinte chu kan nunphung leh khawsak dan hre sa bik loa lo lut an nih thu sawiin Tourism Minister chuan, “Tourism chuan mi zawng zawng a nghawng avangin kohhran leh khawtlang hruaitu te, tlawmngai pawlte nen thawhhona tha tak nei a lo dawnsawn a ngai. December thla chhungin district pathum belh tel lovin khualzin mi nuai 1.1 chuang kan nei,” a ti.

Tourism Minister chuan khualzin kan lo dawnsawn dan tur mipuiten kan lo hriatthiam bakah eng chinah nge tihte pawh kan hriat a pawimawh tih sawiin, “Biak-In chu khualzinte tlawh chak zingah a tel a, biak-in chhunga awmdan tur leh inthuam dan tur thlenga mikhual lamin an hriat theihna tura hmalak dan leh, eng chinah nge an lo tel ang tihte sawiho a pawimawh hle,” a ti a, CCM nena hmalakho dan turte ngaihtuah a tul thu a sawi a ni.

CCM hruaitute chuan Mizoram a khualzin pung chu lawmawm an tih thu leh Mizoram tlawhtu an pung chuan kohhran pawh a nghawng tel thu an sawi, “Kohhran anga ngaihtuahna sen a, hma lak a tul,” an ti. Vawiina thutkhawm hi a bultanna leh sawihawnna huna hman a ni a, hun remchang hmasaah ngun zawka thawhho dan tur ngaihtuah leh hmalakna awm thei tur hrang hrangte thlirhova thutkhawm leh nise tiin rel a ni.