Traffic SP-in thupek a chhuah

Aizawl Traffic SP C Vanlalvena chuan Section 115 of MV Act, 1988-in thuneihna a pek angin Aizawl khawpuia lane driving dan zawm chungchangah thupek a chhuah.

Traffic SP thupek :

Aizawl khawpuiah nitin lirthei pung zelin lirtheia veivakte pawh kan pung zel a, hei hian mihring himna leh traffic rules kenkawh kawngah pawh nghawng thui tak a nei a ni. Lirthei khalhtu chuan mahni veilam nekin kan lane-a tlan zel hi kan tihtur a ni a, hei hi kan vaia him tlanna tur leh intipalh loa tluang taka kan kal theihna tur a ni.

Aizawl khawpui hi mahni lane-a lirthei khalh chungchangah India ram hmun dang thlengin hriat kan ni a, dan kengkawhtute leh mipuite tanrualna vang a ni. Hetiang anih mek laiin kawng zim deuhah two wheeler khalhtu thenkhatten an lane pawnah tlanin; traffic jam lai pawhin anmahni tawk zawnga lokalte tian theih miah loin four wheeler sirah an va dinthuah thin a, hei hi anmahni tawk zawnga lokalte chanvo (right of way) palzutna, traffic jam siamtu leh traffic rules bawhchhiatna a ni.

Keimahni tawk zawnga lirthei lokalte an tian theih dawn loh chuan four wheeler hnungah mahni lane-ah din mai thin tur a ni. Line marking a awm loh pawhin kawngpui zatve hi lehlam atanga lokalte chanvo a ni tih hi hriat fo tur.

Mahni lane-a tlan lo leh min tawk zawnga lokalte lane-a din hi MV Act Section 177, 184, The Motor Vehicles (Driving) Regulations, 2017 Rule No.6 leh BNS section 281 hmanga hrem theih a ni.

Aizawl khawpuia lirthei khalhtu leh kawngpui hmangtu zawng zawngte kan lo him tlan zawk nan traffic rules tha taka zawm a, lane driving ngai pawimawh theuh turin kan inhriattirin kan inngen e.