Triple engine kan hmang dawn &#8211; Dr. K Beichhua

Mizoram BJP chuan vawiin (10.11.2025) chhun khan an office-ah inhlantharna hun an hmang a, thusawitu MBJP President Dr. K Beichhua chuan kum 2028 MLA inthlanpui lo awm turah triple engine an hman dawn thu leh ZPM Sorkar kahlet ve chungchangah central-a an hruaitute an rawn mek thu a sawi.

Dr. K Beichhua chuan kum 2028 MLA Inthlanpui lo awm turah chuan double engine ni loin, triple engine hmangin hma an la dawn tih sawiin, ‘A hmasa berah Pathian, a dawtah central, a dawt lehah state-a sorkar tih hmangin, triple rngine tih thupui hmangin hma kan la dawn a ni. Double pawh a chak tawh hle a, triple engine-ah phei chuan a aia nasa leh zualin a chak dawn,’ a ti.

Chief Minister Lalduhoma’n Siaha khawpuiah BJP nen indo a puang tih sawiin MBJP President chuan, ‘Keini hian ZPM Sorkar hi kan do loh mai bakah, central-ah pawh theihtâwp chhuaha kan thlawp laiin, CM berin min do takah chuan, tunah hian central hruaitute kan rawn mek,’ tiin central-in kap let ve tura thu an pek chuan an kah let ve dawn thu a sawi.