Truck driver suam a ni?

Nimin (20.5.2026) chhun dar 12:30 vel khan truck AS 11/GC – 6232 khalhtu hnamdang (vai) chu Myanmar atanga rawn raltlan ni ngeia hriatten Lunglei District huan chhung Thaizawl leh Tawipui North-II inkarah an suam.

Truck driver sawi danin, Thaizawl Refugee Camp thlang kawngpui lai taka mi pahnihin an lo phar a, chil a hlauh avangin a ding a, mi pahnih hi an chuang ve nghal a ni. Pawisa dilin an vau zui a, a neih loh thua a chhan avangin chemin a ban leh malahte an sat. Tawipui North-II khaw thlen hma deuhah a ding a, truck atangin a zuangthla a ni. Mi pahnih hi a dinna bul kawngthlangah an tlanliam ve nghal a, a bag an lak sak. Bag-ah hian motor document, driving license leh a puten diesel lakna tura pawisa an pekte a awm.

Thudawn danin, ruck driver dangin kawngpuia suam tawk driver lo mu reng chu an hmu a, thiin nasa takin a bual a, motor-ah pawh thisen hmuh tur a awm nual. Tawipui North PHC-ah hruaiin an enkawl a, Hrangchalkawn Police-te pawh an thleng thuai a ni. A hliamte enkawl a nih hnuah Hrangchalkawn PS ah an hruai.

Tawipui North-II YMA-te chu inpunkhawmin, truck driver-in amah suamtute tlanchhiatna nia a sawiah hian mi pahnihte hi an zawng a, mahse an hmu zo lo. Lunglei DC lamin raltlante biometric enrollment leh thlalak an neih vangin police-in truck driver hi an entir a, amah suamtu ni ngeia hriat pakhat chu a hmu a, pakhat dang erawh a hmu lo.

Zanah Thaizawl YMA hruaitute nen Thaizawl refugee camp-ah in tin an dap leh a, truck driver-in amah suamtu ni ngeia a hriat an hmu zo lo. A hnua an hriat leh danin, driver-in amah suamtu zinga pakhat zawk ni ngeia a hriat hi Thaizawl refugee camp-a awm angin in register mah se, Serkawn, Lunglei, Meltea awm a ni a, he thuziahlai thleng hian hmuh a la ni lo.