Tualthattu ni ngeia hriat an man

Ni 31.12.2025 zana K Vanlalngaii (78), Lunglei Bazar Veng thattu ni ngeia hriat an man tak thu Lunglei SP J Lalmuankima chuan vawiin (2.1.2025) hian a sawi.

Lunglei SP sawi danin, ni 31.12.2025 zan 09:30 khan telephone hmangin Lunglei Police Station-ah Bazarveng, Lunglei a ruang hmuh thu report dawn a ni. Report dawn a nih veleh Lunglei Police-te chuan thil thlenna hmun hi an pan nghal a, a hmun ah hian tih tur pawimawh leh tul ang angte an ti nghal a ni. Ruang hi chhuatah lo tluin a lu lam hi thutphah sei ah a lo innghat a ni.

Vanlalngaii hi Bazar Veng, Anganwadi Centre hnuai luahin amah chauh a khawsa a ni. Inquest hi dan ang taka neih a nih hnuah Forensic Team-te pawh a hmunah koh an ni.

He thihna chungchangah hian mi kuttuar ni ngei a hriat a nih avangin evidence awm thei angte dapa chhui a ni. Pawikhawihtu hian hnuhma engmah hnutchhiah a nei mumal lo a, Special Investigation Team (SIT) din nghalin hnuchhui harsa tak karah kawng hrang hrang atangin theihtawp chhuaha chhui zui a nih hnuah nizan dar 09:00 khan pawi khawihtu ni a hriat Johny Rosangliana (41) s/o J.Vanlalchhunga of Bazar Veng, Lunglei chu man a ni a; theitawpa thu zawhfiah a ni hnuin ama thil tihsual a ni thu police hmaah a inpuang ta a ni.

Eveidence awm thei ang angte lak khawm mek a ni. Pawikhawihtu nia rinhlelh hi vawiin hian court-ah thawn nghal a ni.

K Vanlalngaii hi December 31, 2025 zan dar 9 vel khan Lunglei Luangmuala cheng a faten thiin an hmu a ni.

Thlalak : K Vanlalngaii