News

TANHRILA TUALTHIHNA THLENG AVANGA A HNU ZELA THIL KAL COURT-IN A NGAIHTUAH

Vawiin (24.02.2026) hian tunhnaia tualthihna thleng leh a hnu zela thil thleng sawi hlawh takah RL Peka (L) nupuiin police-in ni 27.01.2026 a an thuchhuaha Marina Lalchhanchhuahi, Tanhril thattua a pasal an puhna leh Police PR avanga veng chhung atanga hnawh chhuah an nihna sut an dilna chu Gauhati High Court-in a ngaihtuah.

High Court-ah hian an in halna avanga an bungraw chhia sawrkar leh hnawhchhuahna signtu laka compensation Rs 7,61,130 dilna leh henga inhnamhnawihte case siamsak turin an dil tel.

Thubuai thehluttu hian a pasal chu engti kawngmaha Marina-i thattu a nih theih loh thu sawiin, ‘YMA mibo zawnna ni 3.12.2026 a an thuchhuah ah pawh ni 1.12.2025 tlai lam dar 5 ah Marina-i hi Tanhril Vengtharah auto rickshaw-a a chuang lai hmuh thu tarlan a ni. Hemi ni hian Pu Peka hi chawhnu pumpui inah awmin an chhungte nen chaw an eikhawm a, pawn lamah a chhuak tawh lo. Marina-i thih avanga an in atanga zuang thla ni lovin, accident palh avanga tla thla niin mit ngeia hmutu pawhin a zuangthla ni loin a far thla tiin a sawi. Tanhril atanga hnawhchhuahna lehkha siamtute hian an awmna pawl (YMA, MHIP, MUP, LC) anga thutlukna (Executive Committee notice leh thurel) pawh awm loin hnawhchhuahna hi an siam,” a ti.

Thubuai thehlutttu ukil chuan Police thuchhuahtu IGP & Chief Public Relation Officer, MRP, Media Cell hian Supreme Court in People’s Union for Civil Liberties & Anr. Vs. State of Maharashtra & Ors (2023 INSC 833) case a Police-in PR an siam dan tur kaihhruaina a bawhchhia a ti. Tin, Supreme Court-in Tehseen S. Poonwalla Vs. Union of India & Ors (2018 9 SCC 501) case a hetiang mipui mob rule chungchanga inhnamhnawihte case siam sak tur an nih thu court-ah hian a thlen.

RL Pekate in halsak kaihhnawihah hian social media-ah heta inhnamhnawihte chiang taka lang chunga tumah man an la nih loh thu court-ah hian sawilan a ni. Court hian sawrkar leh hnawhchhuahna lehkha sign tute hi March 9, 2026 ah insawifiah turin a ti.