News

PHE Minister Prof. Lalnilawma chuan vawiin (29.5.2026) hian a office-ah thuthar thehdarhtu thenkhatte kawmin, Aizawl khawpui tui tlan ber Tlawng Lui tui pump na pakhat, Greater Aizawl Water Supply Scheme Phase-I tui pump khawl awmna chu tui lianin a chim phak loh tura a awmna hmun tihsan hna thawh a nih dawn avangin duh anga tam tui pump theih a nih dawn loh thu a sawi a; Aizawl mipuite chu tui ren tur leh fur ruahtui khawl turin a ngen.

Prof. Lalnilawma chuan kum 2024-a Cyclone Remal vanga tuilianin Tlawng tui pump-na khawlte a chim nasat avanga harsatna thleng ang kha a thlen nawn tawh loh nan tui pump khawlte chu tui chim phak loha dahsan tum a nih thu sawiin, “Naktuk atangin phase-I khawl hi metre 5 vela sangin chawisan hna thawh tan a ni dawn a, thla 6 atanga thla 9 inkar vel chhunga thawh zawh theih beisei a ni. Aizawl Water Supply Scheme Phase -III, Setlak tui pump-na khawl pawh tuilianin a chim phak loh tura dahsan tho tur a ni. Hna hi thawh tan mai tura peihfel ni tawh mah se, mipui hnena tuisem a khaihlak nasat lutuk loh nan phase-1 hna thawh zawh hnua thawh tan turin kan ruahman ta zawk,” a ti.