Jan 29, 2026
Thursday
Nimin (28.1.2026) a Tuirial luia bomb hmanga sangha man chungchang Fisheries Director hnena report lut leh hemi chungchanga social media a lo lang chu Fisheries Department-in an bawhzui nghal a, report dawn a nih veleh District Fisheries Development Officer, Aizawl leh officer dangten Tuirial hmunah an kal chilh nghal a ni.
Sorkar thuchhuah tarlan danin, an chhuinaah Tuirial Branch YMA hian Mizoram Fisheries Act 2002 Section 6 (1) (a) – ‘Geletine/ explosives hmanga sangha hman phal loh’ tih chu an bawhchhe ngei tih finfiah a ni. Helai hmuna department mi leh sate an thlenthlak hian sangha tam zawk lo hralh zawh tawh a ni a, a bang awm ang angte man sak nghal niin, laboratory a enfiah a nih hnuah danin a phut angin hal ral a ni.
Koh an nih angin Tuirial Branch YMA hruaitute hi vawiin khan Fisheries Director hmaah inlanin, Mizoram Fisheries Act 2002 Section 10 – Compounding of Offences tlawh chhanin pawisa chawitir an nih bakah, tun hnuah hetiang thil hi thleng tawh lo tur leh Tuirial a sangha man leh zawrh kawngah pawh Mizoram Fisheries Acts-in a phut anga mumal taka kalpui a nih theih nan Fisheries Department theihtawp a thawhpui tura intiamkam tir an ni.
Fisheries Department chuan kan luidung nungcha nasa taka suat thei – tur, ru, bomb, chinai leh dynamo-te hmang lo turin mipui an chah nawn leh a, hetiang tih chingte hi theihtawpa umzui a, hmalak zel an tum thu an sawi.
