Union Minister zinga Kristian awm chhun a rawn campaign

Nimin (5.11.2025) Union Minister zinga Kristian awm chhun George Kurian, Union Minister of State for Fisheries, Animal Husbandry and Dairying, and Minority Affairs changtu chuan, Dampa Bial by-election lo awm tur atana campaign beihpui thlak turin, zankhat riakin Mizoram a lo kal a, vawiin vek Darlung khua-a public meeting-ah thu a sawi.

George Kurian chuan kum 1980 ah BJP din a nih lai aṭang khan BJP a lo zawm ve tawh tih sawiin, ‘Kerala State a awm ka ni a, Kristian dik tak leh ṭha tak ka ni bawk a ni. Vawiinah hian Mizoram a Kristianten BJP hlauh kan inzirtir thin hi a mak hle mai. Vawiin thleng hian BJP ka ni a, Kristian ka ni bawk a, inrem lohna leh harsatna engmah ka la tawk ngai lo a ni. Chuvangin BJP hlau tura inzirtirna hi a politics-a inbeihna mai mai a ni,’ a ti.

Kerela atanga Dampa Biala a campaign nachhan chu, Dampa Bialin development an hmuh ve theihna tur atan a nih thu sawiin George Kurian chuan,
‘BJP-in kan thupui ber chu development a nih avangin, Mizoram hmangaih êm êm tu PM Modi chuan, tun hnaiah pawh cheng vbc. 8,000 sengin Mizoram khawpui tlawh pawh thei turin railway thar Mizoram min pe a ni,’ tiin rel kawngin Mizoram tan inkalpawhna a tih awlsam thu a sawi.

Darlung an thlen nan kawgpui zim tak leh chhe tak an paltlang tih sawiin Union MoS chuan, ‘State sorkarin a ngaihthah zia che u ka hmu a, a lungchhiat thlak hle a ni. Dampa Bial hian kawngpui ṭha tak in mamawh a, kuthnathawktute tan link road-te kan mamawh tih ka hria a ni. Heng bakah pawh mipui mamawh dang tamtak a awm tih ka hria, Dampa bial mamawh te hi Pu Lalhmingthanga BJP official candidate in thlan tlin chuan kan pe ang che u,’ a ti.