UNNATI inhrilfiahna hun buatsaih

Vawiin (8.5.2026) hian Sawrkar Laipui hnuaia Department for Promotion of Industry and Internal Trade (DPIIT) leh Mizoram Sawrkar hnuaia Department of Commerce & Industries tangkawp chuan UNNATI Scheme-in a tum te inzirtirna leh inhrilhfiahna hun Royale Lalawi Hotel Conference Hall, Khatlaah an buatsaih a, Commerce & Industries Minister F. Rodingliana’n a hmanpui.

F. Rodingliana chuan thu sawiin, “Hun rei tak chhung kan ram leilungin a zir tawk loh avangin investor-ten rawn luh an hreh thin a, chu harsatna chu KMMTTP-in a rawn thlak danglam mek a ni,” tiin international border thui tak kan neihte hi a hlutna hre tur leh hemi behchhan hian UNNATI Scheme hmang tangkai thiama, investors tam zawk hip lut thei tura tan la zual zel turin kal khawmte a chah.

UNNATI Scheme hnuaia inziak lut an tlem lutuk chu pawi a tih thu sawiin Commerce & Industries Minister chuan, “Sawrkar Laipui lama thuneitute pawhin awlsam zawka inziah luh a, mi tam zawkin he scheme hi an hman tangkai ngei theih nan a process ti awlsam se ka duh,,” tiin UNNATI Registration Certificate sem nghalin, an registration approved tawh mi pasarih hnenah UNNATI registration certificate a hlan.

DPIIT Director Rajesh Panwar pawhin thu sawiin, Mizorama investor-te leh entrepreneur-te tana an inhawn thu leh zawhna leh harsatna an neih apiangte chu chinfelsak an inhuam thu a sawi a, UNNATI Scheme in a cover lo a nih pawhin sawrkar scheme hrang hrangte zirchiang a, hamthatna an dawn theihte hre tura hma la thin turin kalkhawmte a chah a ni.

DPIIT Nodal Officer Karampaul Singh sawi danin, UNNATI Scheme hnuaiah Mizoram tan North-East State dangte aia an pawisa dawn theih a tam zawk. Mizoram tan cheng vaibelchhe 453 lai dah a ni. Mi pasarih chiahin registration an la ti a, application 26 chauh Mizoram atanga dawn a ni.

Karampaul Singh Mizoram chu Zone – B, hlawkna tam zawk tel theihna zone a awm an nihna te chu hria a, tun aia nasa zawka scheme hi hmang tangkai turin kalkhawmte a chah a, kalkhawmte hriat duh angte leh an harsatna neih an sawite chu a chhang nghal a ni.