UNNATI ram zau tak hmuh chhuah leh a ni

Mizoram Pradesh Youth Congress Committee (MPYCC) chuan Vantawng khawhthla thlirna chhehvel leh Kanghmun South ramah mahni inhaivurna ni ngeia ngaih UNNATI ram zau tak hmuhchhuah leh a nih thu an tarlang.

MPYCC tarlan danin, vawiin (21.3.2026) hian 2024 kum tira Buangpui ram chhung Vantawng khawhthla thlirna hmun leh a chhehvel Kanghmun South rama Chief Minister Lalduhoma’n a lal hrawtna dawhkan a luah hlimhlawta ram zau leh manto taka a lei nia sawi chu a hmunah an president Laltawnliana hoin an enfiah a ni. Kum 2021 Serchhip bial By Election-a rethei taka insawi khan Chief Minister a nih tuk atangin Mizoram mi hausa ber zingah a tel nghal tih a hmalakna hian a nemnghet.

Lalduhoma hian Vantawng khawhthla thlirna chhehvel buh tin 25-30 hmun vela zau, mi panga ram chu Chief Minister a nih hlim chhawnah a tahtawlin (plot) te tein a lei nia tarlangin MPYCC chuan, “Kanghmun South lamah pawh mi 4 ta lei niin a then phei chu February thla tawp lamah vah chauh niin kar hnih pawh chapchar a nih hmain hal a ni. He a ram hi sorkar department pakhat enkawl tir tura ruahman nia sawi a ni tih a hmunah kan finfiah a ni,” an ti.

MPYCC chuan Vantawng ram leh Saphak lui chhak lam Vantawng khawhthla thlirna remchang hmun tha lai zawng zawng chu Chief Minister hian SASCI Scheme (Development of Iconic Tourist Centres to Global Scale) hmanga Vantawng khawhthla (Thenzawl) bula rope-way siamna tura cheng vaibelchhe 34.50 hmanga hmalakna kalpui tur compensation a dawn theihna hisap chung leh, Thenzawl Peace City-in a huam tur Kanghmun South rama mahni mimal inhaivura hmalakna a ni tih tarlangin, “CM ni rei lo ber a ni chungin CM kan neih tawh zinga hausa chak berah kam ngai,” tiin Vantawng khawhthla leh a chheh vel hi he’ng lai ram neitu khuate hian Forest Department enkawlah ngaiin an pa pek reng thin a, tun hnai kum hnih velah khan mak tak maiin Lengpui Airport sir ram hralh tura hmanhmawh taka file kalpui a nih angin party pakhat ruahmannain mi thenkhatin anmahni pualin hmanhmawh takin an insem a, an ram in pek/sem chu CM hian hmanhmawh takin a lei khawm sak ve thung niin an tarlang.