Unnati Scheme sawifiah a ni

Tourism Department chuan vawiin (19.2.2026) hian press note ti chhuakin, Transformative Industrialization Scheme (UNNATI-2024) an sawifiah.

Tourism Department sawifiahna :

Unnati Scheme hi North East State-te industry Ssector-a hma an sawn theihna tura back ended subsidy 50% thlenga claim theihna tura duan a ni. He scheme hian tourism sector – hotel, homestay, picnic spot leh resort etc. te pawh a huam a ni.

Unnati Scheme hnuaia incentive hmuh theihnate chu – Capital Investment Incentive (CII), Capital Interest Subvention (CIS) leh Manufacturing & Service Link Industry (MSLI) te an ni. Tun din hmuna mipuiin an hriat fiah tul ni a lang chu, Capital Investment Incentive (CII) hi a ni. He incentive hi GST pek ngai chiah leh GST pek ngai loah then hran a ni a, GST pek ngaiah hian incentive sang thei ber chu cheng vbc. 7.5 a ni a, cheng vbc. 7.5 incentive hmu tur chuan project cost hi cheng vbc. 15 aia tlem lo a nih a ngai.

Chutih laiin, GST pek ngai lo industry-ah chuan cheng vbc. 10 hi incentive hmuh san theih ber a ni a, project cost chu cheng vbc 20 aia tlem lo a nih a ngai thung. Mi thenkhatin incentive hmuh san theih ber cheng nuai 250 nia an sawi hi an hriatsual palh a nih a rinawm.

Tourism Department chuan Unnati Scheme hi a tam thei ang berin hmang tangkai se a duh a, district leh khaw hrang hrang tlawha official-te an zinchhuahnaah an sawi darh zel thin. Tourism Sector-a Unnati dil tur hian a hmasa berin department atanga ‘Consent to Establish’ lehkha neih a ngai. Tourism Director consent letter hi dil tur a ni. An hmun hmate endik a nih hnuah consent letter hi issue thin a ni

Unnati Scheme hnuaia incentive hmuh tuma project neite hian bank loan an la tlangpui a, bank loan laa bul tan an nih chuan documents pawimawhte an neih kim hnuah an project hi an loan lakna Bank ten Appraisal an tihsak tur a ni.
Mahni sum hmanga bul tante erawh chu NEDFI in Appraisal an tih sak tur a ni.

Documents tulte an neih vek hnuah Commerce & Industries Department-ten portal-ah an upload sak tur a ni. Unnati Scheme hi DPIIT enkawl a nih angin DPIIT hian documents leh a tul dangtea a diltute puitu turin Grant Thornton Company atangin Consultant pakhat chu Mizoramah an dah nghe nghe a ni.

Tourism Sector bik atan chuan incentive hi an infrastructure siamte an zawh hnu, an hotel/homestay leh a dangte an operate hnu, Tourism Department registration an neih fel vek hunah chauh claim hi an hmu thei ang.

He scheme hi extend a nih loh chuan March 31, 2026 hma ngeiin portal-ah
documents kimchang nen dilna upload hman tur a ni. Vawiin (February 19, 2026) thleng hian Tourism Department chuan Consent to Establish hi mi 44 tan a
pe chhuak tawh.

Heng mi 44 te hian Unnati Scheme hnuaiah incentives hmuh an inbeisei vek avangin loan an la a nih pawhin, Unnati Scheme behchhana bank loan la anga ngaih vek an ni.

Tourism Department-in Consent to Establish mi tana an pek chhuah tawh an tarlan zingah hian Ruata, Eureka Estate, Chawlhhmun, Aizawl tih a tel a, consent pek ni chu December 12, 2024 a ni. A business leh address chu ZARA Villa, Eureka Estate, Chawlhmun, Aizawl tih a ni.