Vawi 100 thisen pe tling

Vawiin (24.7.2026) chawhma dar 11-khan Electric Veng Branch YMA , Aizawl chuan an member C. Lalremruata’n thisen vawi 100-a pekna pualin, branch pum huap thisen pek runpui Electric Veng, YMA Hall-a an buatsaih a Health Minister Lalrinpuii’n a hman pui.

Health Minister chuan tlawmngaia thisen petute an pawimawhzia “Thawktu thiam tak tak neiin khawl ṭha leh changkang tak tak nei pawh ni ila tlawmngaia thisen petu an awm si loh chuan chhawr ṭangkai lohin an awm dawn tihna a ni. Midang tana thisen pek hi a pawimawh em avangin kum tin World Blood Doner Day June 14-ah hman ṭhin a ni. Kan mihringpuite nun chhan nân leh an nun pawhsei sak nân thisen pêk hi a ngai ṭhin a, tun aia kan uar deuh deuh a ngai,” a ti.

C Lalremruata chuan pawhin thu sawiin, “Kum ka tlin hmain damlo chhungten thisen pe turin min ngen a, ka la pe thei si lo a; hreawm ka ti em em. Kum ka tlin hunah a mamawhtute tan thisen a tam thei ang ber ka pe ang tiin rilru kan siam a, tun dinhmun thleng tur hian ka intiamna chuan min nawrkal niin ka hria,” a ti a, Mizo ṭhalaite chu hriselna ngai pawimawh a, mahni invawng thianghlim tur leh mi dangte tan a tam thei ang ber thisen pe turin a sawm nghal.

Electric Veng Branch YMA President C Lalnunfela pawhin thu sawiin, “Electric Veng tan ni chhinchhiah tlâk tak a ni, vawiin hi a ropui bîk em em chhan chu kan member Tv. C. Lalremruata’n thisen unit tling ngeiin vawi 100 a pek ni a ni a, a member puite chuan kan chhuang tak zet a ni” a ti.

Vawiinah hian C. Lalremruata hi chawimawina leh lawmpuina thuziak mi eng emaw zatin an hlan a, Electric Veng YMA Member mi 100, mipa – 94, hmeichhia – 6 -in he ni pual hian thisen hi an pe a ni.