News

Vawiin (19.11.2025) chhun khan Lunglei District Level Committee on Fixation of Price of Meat, Vegetables and Fruits chu Lunglei DC Conference Hall-ah Additional Deputy Commissioner Zoramdini kaihhruaiin an ṭhu khawm a, Lunglei District chhunga vawksa zawrhna leh hralhna tur man an bithliah thar.

He ṭhutkhawmah hian DC Office, Commerce & Industries, Agriculture, AH & Veterinary, Fisheries, Horticulture, Police, Legal Metrology, Local Council, Lunglei District Consumer Association leh District MJA ai awhte an tel. AH & Vety Department aṭangin vawk vulh chungchang leh a kaihhnawih thil pawimawh hrang hrang ngaihthlak niin, vawk vulhtu, a sattu (zuartu) leh a leitu (consumer)-te dinhmun leh chanvo te kil hrang hrang aṭanga thlir ho a ni.

District Level Committee chuan Lunglei District chhungah vawksa chu a misa emaw, a ti ṭha lai bik emaw pawh thliar lovin kg khat ₹450/- ni se, an ti. Kg khatah hian a misa leh a kawchhungte pawh a tel theih tho avangin leh a hranpaa a sa ṭha pawh thliar loin a man hi hrut rual mai ni se tia ruahmanna siam niin, rorel hi kum thar lamah a ṭul anga thlir let ni se, tih a ni.

District Level Committee ṭhu khawm chuan buk tling ngeia vawksa hralh a nih theih hma lak ni se tiin, a en zui turin C&I, Legal Metrology, Police leh Local Council te ruat bik an ni. Sawrkarin dan a neih angin rate bithliah anga sa zuar lo leh buk tling lote chungah hremna leh kawh theih a nih thu te, sawrkar building-a inzuarte chu an seat cancel-sak theih an nih bakah ₹1,000/- chawitir theih an nih thute tarlan a ni.